काठमाडौं (हाम्रो खेलकुद) – नेपाल ओलम्पिक कमिटी (एनओसी) ले आफु मातहतमा रहेको २७ राष्ट्रिय खेलकुद संघलाई आफ्नै एन्टी डोपिङ नियम बनाउन निर्देशन दिएको छ । भिडियो कन्फरेन्सको माध्यमबाट एनओसीले संघका पदाधिकारीसँग एन्टी डोपिङको महत्वबारे बुधबार भएको छलफलले संघलाई आफ्नै नियम बनाउन निर्देशन दिएको हो ।

एनओसीले संघहरुलाई १५ अगस्ट भित्र संघले एन्टी डोपिङ नियम बनाएर नेपाल एन्टी डोपिङमा बुझाउन निर्देशन दिएको छ । एनओसीका मेडिकल कमिसनका अध्यक्ष डाक्टर सरोज कृष्ण श्रेष्ठले संघका पदाधिकारीलाई २०२१ बाट विश्व एन्टी डोपिङ कोडको धारा १८ अनुसार सबै संघले आफ्नै एन्टी डोपिङ नियम बनाउनु पर्ने नियम लागु गरेको जानकारी गराएका थिए ।

यस्तै डाक्टर श्रेष्ठले २०२१ पछि एन्टी डोपिङ नियम नभएको संघले अन्तर्राष्ट्रिय प्रतियोगिता खेल्न नपाउने नियम रहेको उल्लेख गरे । एनओसीका अध्यक्ष जीवनराम श्रेष्ठले यसलाई सकारात्मक र गम्भीर रुपमा लिनुपर्ने बताउँदै हाम्रा खेलाडीहरुले निषेधित पदार्थहरु खाइरहेका छन् कि भनेर सतर्क हुनुपर्ने बताएका छन् ।

एनओसीका महासचिव निलेन्द्रराज श्रेष्ठले संघलाई एन्टी डोपिङ नियम बनाउन आवश्यकता परे एनओसी, मेडिकल कमिसन र एनओसीका स्टाफले सहयोग गर्ने बताएका छन् । छलफलमा एनओसीमा आबद्ध २७ खेलकुद संघका पदाधिकारीहरुको सहभागिता रहेको थियो ।