क्यानडाबाट सेते दाईको परिवारलाई आर्थिक सहयोग

काठमाडौं (हाम्रो खेलकुद) – त्रिवि अन्तर्राष्ट्रिय क्रिकेट मैदानको ग्राउन्ड स्टाफ दिवंगत जयबहादुर तामाङ (सेते दाइ) को परिवारलाई नेप्लिज क्यानेडियन क्रिकेट क्लबले आर्थिक सहयोग गरेको छ।

नेपाली राष्ट्रिय क्रिकेट टोलीका पूर्व सदस्य नरेश बहादुर बुढाएर र महेश क्षेत्रीको अगुवाईमा क्लबले पठाएको १ लाख रुपैयाँ सेते दाइको परिवारलाई हस्तान्तरण गरिएको हो ।

सेते दाईको उपचार खर्चको लागि आर्थिक संकलन गरिएपनि उनको उपचारकै क्रममा निधन भएपछि त्यही उपचार खर्चको लागि संकलन गरिएको रकम शुक्रबार सिप्यानका अध्यक्ष मनिषराज पाण्डेले सेते दाईको श्रीमतीलाई हस्तान्तरण गरेका हुन् । रकम हस्तान्तरण गर्दै सिप्यानले क्लब र खेलाडीहरुलाई धन्यवाद दिएका थिए ।

लामो समयबाट त्रिवि मैदानमा काम गर्दै आएका सेते दाइको गत चैतमा निधन भएको थियो । उनी मृगौला रोगबाट ग्रसित थिए । यसअघि सिप्यानले पनि उनको उपचारका लागि रकम हस्तान्तरण गरेको थियो ।

सिप्यानले वर्षेनी आयोजना गर्दै आएको एनसीसीएस-सिप्यान क्रिकेट अवार्ड पनि यस वर्ष स्थगित गर्दै पुरस्कारको सम्पूर्ण रकम प्रधानमन्त्री कोरोना कोषमा सहयोग गरेको थियो ।