काठमाडौं (हाम्रो खेलकुद) – कोरोना भाइरस कोभिड १९ को संक्रमण रोक्न सरकारले लकडाउन गरेको ४५ दिन भन्दा बढी भइसकेको छ । लकडाउनका कारण निम्न आयश्रोत र दैनिक मजदुरी गरेर परिवार पार्नेका लागि निकै कष्ठकर बन्दै गइरहेको छ ।

यस्तोमा खेलाडी, खेल पदाधिकारी, राष्ट्रिय संघले आफ्नो तर्फबाट अलग अलग ठाँउमा सहयोग गर्दै आएका छन् । यसमा राष्ट्रिय खेलकुद परिषद् (राखेप) का सदस्य एकेन्द्र कुँवरले व्यक्तिगत रुपमा सहयोग गर्दै आएका छन् । समाजसेवामा पनि सक्रिय कुँवरले अहिले काठमाडौंका साधु सन्त, अपाङ्ग, दृष्टिविहीन, सुदुरपश्चिमबाट काठमाडौं आई अध्ययनरत कयौं  विद्यार्थीलाई खाद्यान्न वितरण गदै आएका छन् । 

कुँवरले अर्को साता आफ्नो जिल्ला अछाम बेयलपाटामा स्वास्थ्य मन्त्रालयको सहयोगमा सञ्चालन न्याय हेल्थ नेपाललाई आवश्यक स्वास्थ समाग्री दिने तयारी गरिरहेका छन् । उनका अनुसार पिपिई सय वटा, डर्मल गन १० मास्क २ हजार, पन्जा २ हजार , सनिटाइजर १ सय लिटर, एम ९५ मास्क १ सय दिन अर्को साता सम्म पुर्याइसकिनेछ ।

यसअघि कुँवरले आफ्नो स्वास्थ्य सुरक्षालाई जोखिममा राखेर आफ्नै गाडीमा परिक्षणका लागि सुदूरपश्चिमबाट २ सय स्वाब काठमाडौं लाएका थिए । सुदूरपश्चिम प्रदेश कोरोना संक्रमणको उच्च जोखिममा रहेका बेला चैत १२ गते संक्रमित फेला परेसँगै अन्य सम्भावित संक्रमितबाट संकलन गरिएको २ सय स्वाब ४८ घण्टासम्म पनि परीक्षणका लागि काठमाडौं पुर्याउने अवस्था नदेखेपछि कुँवर आफै अघि सरेका थिए ।