काठमाडौं (हाम्रो खेलकुद)– राष्ट्रिय खेलकुद परिषद् (राखेप) ले आफ्ना भौतिक पूर्वाधार क्वारेन्टाइनका लागि प्रयोग गर्न दिने बताएको छ । कोरोना भाइरस कोभिड १९ अहिले विश्वव्यापी महामारीका रुपमा देखिएको छ । नेपालमा पनि सोमबार एक जना संक्रमित पाएको स्वास्थ्य मन्त्रालयले जनाएको छ ।

नेपाल पनि संक्रमणको उच्च जोखिममा रहेको ध्यान राख्दै विभिन्न ठाँउमा क्वारेन्टाइन बनाएको छ । यसैबीच राखेपले पनि आफ्नो संरचना प्रयाग गर्न सरकारलाई आग्रह गरेको छ ।

राखेपका प्रवक्ता एवंम् विभागिय प्रमुख कुलबहादुर थापाले सोमबार जारी गरेको विजप्तीमा भनिएको छ ‘सरकारले गरेको निर्णय अनुसार क्वारेन्टाइन निर्माणका लागि आवश्यक पर्ने राखेप अन्र्तगत उपत्यकामा रहेको दशरथ रंगशाला, सातदोबाटो खेलकुद परिसर, मुलपानी, किर्तिपुर, च्यासल र सानोगौचरनलगायत सातै प्रदेश तथा जिल्ला अन्र्तगत रहेका भौतिक पूर्वाधार प्रायोग गर्नु हुन परिषद् हार्दिक अनुरोध गदै कोराना संक्रमणको रोकथामका लागि राखेप ऐक्यबद्धता ब्यक्त गर्दछ ।

अखिल नेपाल फुटबल संघ (एन्फा) ले आइतबार विज्ञप्ती जारी गर्दै सातदोबाटोस्थित होस्टल, धरान, बुटवल र रौतहटमा रहेको महिला एकेडेमीलाई क्वारेन्टाइनका रुपमा प्रयोग गर्न सकिने जनाएको थियो ।