काठमाडौं (हाम्रो खेलकुद)– विश्वभर नै महामारीको रुपमा फैलिएको कोरोना भाइरस (कोभिड–१९) अधिकांश खेलकुद गतिवधि रोकिएको छ । नेपालमा पनि सबै खाले खेल स्थगित भएको छ । कोराना सम्भावित खतरालाई मध्यनजर गर्दै फुटसलका गतिविधि पनि स्थगित भएको छ ।

नेपाल फुटसल संघले बिहीबार सरकारको निर्णयलाई आत्मसात गर्दै शुक्रबारदेखि फुटसलका सम्पुर्ण गतिविधि अर्को सुचना जारी नभएसम्मको लागि स्थगित गरिएको जनाएको छ ।

सरकारले बिहिबारबाट लागु हुने गरी खेलकुद रंगशाला, पौडी पोखरी र जिम लगायतका लगायतका अन्य क्षेत्रहरु बन्द गर्न निर्देशन दिएको थियो । फुटसल संघका अध्यक्ष राज महर्जनले सरकारी निर्णयलाई मध्यनजर राख्दै फुटसलका गतिविधि स्थगित गरिएको जानकारी दिएका छन् ।

‘सरकारले नै बैशाख तेस्रो सातासम्म खेलकुद रंगशाला, पौडी पोखरी र जिम लगायतका लगायतका अन्य क्षेत्रहरु बन्द गर्न प्रस्ताव गरेको छ ,’ अध्यक्ष महर्जनले भने, ‘हामीलाई पनि फुटसलका गतिविधि बन्द गर्न अनुरोध आएको थियो । त्यसै अनुसार हामीले पनि फुटसल बन्द गर्ने निर्णय गरेका हौं ।’

सरकारको नियर्णलाई सबैले स्वीकार गनुपर्ने उल्लेख गर्दै अध्यक्ष महर्जनले भने, ‘सरकारको निर्णयभन्दा हामी बाहिर जान सक्दैनौ । हामी मातहातका अथवा हाम्रो सम्पर्कमा रहेका फुटसलहरु शुक्रबारबाट बन्द हुनेछन् । कतिसम्म बन्द हुने भन्ने यकिन छैैन ।’

पछिल्ला केहि वर्षमा फुटसल काठमाडौं उपत्यका लगायत देशका विभिन्न सहरमा लोकप्रिय रहँदै आएको छ ।