नेपालगन्ज (हाम्रो खेलकुद) – छैटौ संस्करणको प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको फाइनलमा दुई विभागीय टोली नेपाल एपिएफ क्लब र नेपाल पुलिसक्लब भिड्ने भउको छ ।

नेपालगन्जस्थित कभर्डहलमा मंगलबार भएको सेमिफाइनलको विभागीय डर्वी भिडन्तमा त्रिभुवन आर्मी क्लबको चुनौती ३–२ ले पन्छाउदै पुलिसले फाइनलमा एपिएफसँगको भेट पक्का गरेको हो । फाइनल बुधबार हुनेछ । बुधबारै डायमन्ड र आर्मीबीच तेस्रो स्थानको लागि प्रतिस्पर्धा हुनेछ ।

एपिएफले मंगलबारै होङ्ग्वान्जी न्यु डायमन्ड स्पोर्टस् क्लबलाई ३–० को सोझो सेटमा हराउदै फाइनलमा स्थान सुरक्षित गरेको थियो । एपिएफले डायमन्डमाथि २६–२४, २५–१७ र २५–१८ को जित निकालेको थियो ।

प्रतिस्पर्धात्मक बनेको पहिलो सेट पुलिसले २३–२५ ले गुमाएको थियो । त्यसपछिको दुवै सेटमा पुलिस २५–२० र २५–२१ ले विजयी हुदै खेलमा २–१ को सेटमा अग्रता लिन सफल भएको थियो । चौथो सेट पुलिसले १४–२५ ले गुमाएपछि खेल पाँचौ सेटमा लम्बिएको थियो । निर्णायक सेटमा पुलिसले एकपक्षीय खेल पस्कदै १५–८ ले विजयी हुदै फाइनलमा पुग्न सफल भयो ।

बाँके जिल्ला भलिबल संघद्धारा गत आइतबारबाट शुरु भएको प्रतियोगितामा घरेलु भलिबलका चार चर्चित टोलीसँगै आयोजकको एक टोली गरी ५ टोलीको सहभागिता रहेको थियो ।
प्रतियोगिताको विजेताले २ लाख रुपैया हात पार्नेछ । दोस्रो हुनेले १ लाख रुपैया तथा तेस्रो हुनेले ५० हजार प्राप्त गर्ने छ । प्रतियोगिताको सर्वोत्कृष्ट खेलाडीले २५ हजार रुपैयाँ प्राप्त गर्नेेछन् ।