नेपालगन्ज (हाम्रो खेलकुद)– प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगितामा ६ टोलीले प्रतिस्पर्धा गर्ने तय भएको छ ।

आइतबारबाट सुरु हुने प्रतियोगितामा घरेलु भलिबलका चर्चित ४ क्लब नेपाल एपिएफ, नेपाल पुलिस क्लब, त्रिभुवन आर्मी क्लब, होंगान्जी न्यू डायमण्ड क्लबसहित ६ टोलीले प्रतिस्पर्धा गर्ने आयोजक बाँके जिल्ला भलिबल संघले जनाएको छ ।

बाँके जिल्ला भलिबल संघका अध्यक्ष टीएस ठकूरीका अनुसार आयोजकको एउटा टोली र भारतको एसएसबी पुलिसले प्रतियोगितमा प्रतिस्पर्धा गर्नेछन् । साविक विजेता समेत रहेको एपिएफको टोली शुक्रबार नै नेपालगन्ज आइसकेको छ ।

चोटका कारण टोलीकी मुख्य खेलाडी सरस्वती चौधरी र नेविका चौधरी विनानै एपिएफ नेपालगन्ज पुगेको हो । खेलको तालिका शनिबार प्रकाशित गरिने बताइएको छ । सहभागी टोलीलाई दुई समूहमा विभाजन गरि लिग कम नकआउटका आधारमा खेल गराइने बताइएको छ ।

समूहका शीर्ष २ टोलीले सेमिफाइनलमा प्रवेश पाउनेछन् । प्रधानमन्त्री कपको तयारीका बारेमा शुक्रबार आयोजित पत्रकार सम्मेलनमा संघिय सांसद कृष्णा केसी नमुनासहित बाँके जिल्लामा रहेको स्थानिय निकायका ८ उपप्रमुखहरुको सहभागिता रहेको थियो । सांसद केसी प्रतियोगिताको संयोजक हुन् ।

फागुन २२ गतेसम्म नेपालगन्ज रंगशालास्थित कभर्डहलमा सञ्चालन हुने प्रतियोगिताको विजेताले २ लाख , दोस्रो हुनेले १ लाख , तेस्रो हुने टोलीले ५० हजार प्राप्त गर्ने यसअघि नै संघले जनाइसकेको छ । प्रतियोगिताको सर्वोत्कृष्ट खेलाडीले २५ हजार रुपैयाँ प्राप्त गर्नेछिन् । डिजिटल पार्टरका रुपमा रहेको हाम्रो खेलकुद डटकमले प्रतियोगिताको प्रत्यक्ष प्रसारण गर्नेछ ।