काठमाडौं (हाम्रो खेलकुद)– राष्ट्रिय भलिबल टोलीका सरस्वती चौधरी महिला र कुलबहादुर थापा पुरुषतर्फबाट नेपाल भलिबल संघका अध्यक्ष मनोरञ्जन रमण शर्मा अवार्डबाट सम्मानित भएका छन् । उनीलाई बर्ष खेलाडी घोषित गर्दै सोमबार सम्मानित गरिएको हो ।

अध्यक्ष शर्माले गत वर्षबाट व्यक्तिगत रुपमा अवार्डको सुरुवात गरेका थिए । दुवैले समन ३५ हजार रुपैयाँ प्राप्त गरे । चोटका कारण सरस्वती भने कार्यक्रममा उपस्थित भइनन् । दायाँ गोलीगाँठाको चोट बल्झिएपछि सरस्वती कम्तीमा तीन साता कोर्ट बाहिर रहने छिन् ।

शनिबार पवर्तमा दिदीबहिनी कपको फाइनल खेलेर फर्केपछि खुट्टा सुन्निएको थियो । गत महिना संघको आयोजना भएको एनभिए अवार्डमा पनि नेपाल एपिएफ क्लबकी सरस्वती र नेपाल पुलिस क्लबका कुल वर्षका उत्कृष्ट खेलाडी घोषित भएका थिए ।

सरकारले भलिबललाई नेपालको राष्ट्रिय खेल घोषणा गरेको खुसीयालीमा अध्यक्ष शर्माले २०७४ को जेठमा १० लाख रुपैयाँको अक्षय कोष स्थापना गरेका थिए । सोही कोषको व्याजबाट बार्षिक रुपमा दुई खेलाडीलाई अवार्ड दिदै आइएको हो ।

सोही अवसरमा एभिसी सेन्ट्रल जोन भलिबलको स्वर्ण पदक विजेता महिला टोलीलाई सम्मान गरिएको थियो । बंगलादेशबाट च्याम्पियन बनेर फर्केपछि नै अध्यक्ष शर्माले व्यक्तिगत रुपमा खेलाडी र टोलीका सदस्यलाई जनही १० हजार रुपैयाँ दिने घोषणा गरेका थिए ।