लमजुङ (हाम्रो खेलकुद) – लमजुङमा भ्रमण वर्ष– २०२० लाई सफल बनाउन सहयोग गर्ने उद्देश्यका साथ ग्रामीण पर्यटकीय केन्द्र राइनासकोटमा रेस्लिङ प्रतियोगिता गरिएको छ ।

राइनास नगरपालिकाको आयोजना हिमालयल टाइगर र शंकर स्पोर्टर्स क्लबको व्यवस्थापनमा शिवरात्रीका अवसरमा उक्त प्रतियोगिता गरिएको हो । प्रतियोगितामा अस्ट्रेलिया, जापान, भारत र नेपालका गरी १० जनाले भाग लिएका थिए । प्रतियोगितामा दुई वटा महिला र पुरुषका सो म्याच, पाँच वटा सिंगल र दुई वटा संयुक्त प्रतियोगिता गरिएको रेस्लर भरत विसुरालले (हिमालय टाइगर) ले जानकारी गराए ।

लमजुङ निवासी रेस्लर विसुरालले यो खेल मूलतः भ्रमण वर्षलाई सफल बनाउने उद्देश्यले आयोजना गरिएको बताए । रेस्लिङका लागि प्रतिव्यक्ति दुई सयको टिकट दर राखिएको थियो । टिकटबाट ६० हजार रुपैयाँ संकलन भएको राइनास नगरपालिकाले जनाएको छ । प्रतियोगितामा सहभागिताका लागि अष्ट्रेलियाबाट हाइपोनोटिक क्रिस ट्रान्स, जापानबाट फुगोफुगो युमैजी र भारतबाट वालिया नास्की आएका थिए ।

नेपालबाट हिमालय टाइगरका साथै संगीता जिरेल, जमुना तामाङ, युनिका र जुरेलीले भाग लिएको हिमालय टाइगरले बताए । रेस्लिङ खेलका सहभागीहरूलाई प्रोत्साहन स्वरुप नगरपालिकाले १०–१० हजार रुपैयाँ प्रदान गरिएको राइनास नगरपालिकाका मेयर सिंहबहादुर थापाले बताए ।