काठमाडौं (हाम्रो खेलकुद)– झापा र संखुवासभाबीच प्रदेश स्तरीय तेश्रो मदन स्मृति पुरुष भलिबल प्रतियोगिताको क्वार्टरफाइनलमा प्रतिस्पर्धा हुने भएको छ । सोलुखुम्बु सदरमुकाम सल्लेरीस्थित योङ्ग स्टार क्लबको खेल मैदानमा जारी प्रतियोगिताको दोश्रो दिन बुधबार लिग खेलहरु सम्पन्न भई क्वार्टर फाइनल पुग्ने टिमको टुंगो लागेको हो ।

झापा समूह ‘ए’ को विजेताको र संखुवासभा समूह ‘सी’ को उपविजेताको रुपमा अन्तिम आठमा पुगेको हो । दोश्रो क्वार्टरफाइनलमा सोलुखुम्बुले खोटाङको सामना गर्ने छ । सोलुखुम्बु समूह ‘बी’ को विजेताको रुपमा क्वाटर फाइनल प्रवेश गरेको हो । खोटाङ समूह ‘डी’ को उपविजेताको रुपमा अन्तिम आठमा पुगेको हो ।

तेश्रो क्वार्टरफाइनलमा समूह ‘सी’ को विजेता सुनसरीले समूह ‘ए’ को उपविजेता धनकुटासँग प्रतिस्पर्धा गर्नेछ । चौथो तथा अन्तिम क्वार्टरफाइनमा खेलमा समूह ‘डी’ को विजेता ओखलढुंगाले समूह ‘बी’को उपविजेता भोजपुरको सामना गर्नेछ ।

दोश्रो दिनको पहिलो खेलमा भोजपुरले उदयपुरलाई २५–२२ र २५–१७ को सोझो सेटमा पराजित गर्यो । यस्तै संखुवासभा सुनसरीसँग २२–२५, २५–१९ र १९ –२५ ले पराजित भयो । झापाले इलामलाई २५–१५,२५–२७ र २५–१७ ले हरायो ।

अर्को खेलमा सोलुखुम्बुले उदयपुरलाई २५–२३ र २५–२३ ले सोझो सेटमा पराजित गर्यो संखुवासभाले पाँचथरलाई २५–१६ र २५–२३ ले हरायो । ओखलढुंगाले मोरङलाई २५–२० र २५–२२ ले पराजित गर्यो । खोटाङले तेह्रथुमलाई २३–२५, २५–१४ र २५–१९ ले हरायो ।

इलाम, उदयपुर, पाँचथर,मोरङ र तेह्रथुमभने लिग चरणबाट नै बाहिरिएको छ । मंगलबार सुरु भएको प्रतियोगितामाप्रदेश १ का १३ जिल्लाको सहभागिता छ ।

क्वार्टरफाइनल खेल

झापाविरुद्ध संखुवासभा

सोलुखुम्बुविरुद्ध खोटाङ

सुनसरीविरुद्ध धनकुटा

ओखलढुंगाविरुद्ध भोजपुर