काठमाडौं (हाम्रो खेलकुद)– त्रिभुवन आर्मी क्लबले तेस्रो हुँदै १५ औं ढोरपाटन डबल लिग महिला भलिबल प्रतियोगिताको अन्त्य गरेको छ । खेल्नुअघि नै तेस्रो स्थान पक्का गरेको आर्मीले आफ्नो अन्तिम खेलमा बुधबार केहि वर्षयता विभागिय टोलीलाई टक्कर दिदै आएको होंगान्जी न्यू डायमण्ड क्लबललाई ३–० को सोझो सेटले हराएको थियो ।

आफ्नो मुख्य खेलाडी प्रतिभा माली विना उत्रेको न्यू डायमण्ड यसपटक भने आर्मीविरुद्ध पहिलो सेटबाहेक कमजोर देखियो । प्रतिभा माघ १० गते क्लब आरबिबी एनभिए क्लब च्याम्पियनसपिको फाइनलका दौरान घाइते भएपछि न्यू डायमण्डले उनी विना ढोरपाटन लिग खेल्नु परेको थियो ।

उनको बायाँ घुँडामा चोट लागेको थियो । घुँडाको शल्यक्रिया गराउनु परेकी प्रतिभा १७ दिनपछि अस्पतालबाट डिस्चार्ज भई अहिले आराम गरिरहेकी छिन् । प्रतिभाको अनुपस्थितिमा टोली आर्मीसँग २५–२१,२५–१४ र २५–१४ ले पराजित भएको थियो ।

प्रतिभासहितको न्यू डायमण्डले पछिल्ला दुई प्रतियोगिताको सेमिफाइनलमा आर्मी टोलीलाई हराएको थियो । पुसको अन्तिममा भएको होंगान्जी न्यू डायमन्ड कप र यसै महिना भएको क्लब च्याम्पियनसिप दुवैको सेमिफाइनलमा आर्मी न्यू डायमन्डसँग पराजित भएको थियो ।

ढोरपाटन लिगको तेस्रो स्थानको आर्मीले १४ खेलमा ३० अंक जोड्यो । २२ अंकका साथ न्यू डायमण्ड चौथो स्थानमा रह्यो । आर्मीले १ लाख ५ हजार र न्यू डायमण्डले ७५ हजार रुपैयाँ प्राप्त गर्यो ।

उपाधिको छिनोफानो आजैको खेलबाट हुँदैछ । जहाँ साविक विजेता एपिएफ र नेपाल पुलिस क्लबबीच प्रतिस्पर्धा हुँदैछ । विजेताले ४ लाख ५ हजार र दोस्रो टोलीले २ लाख ५ हजार रुपैयाँ प्राप्त गर्नेछ ।