पोखरा(हाम्रो खेलकुद)– पोखरामा प्याराग्लाइडिङ वल्र्डकप एशियन टुर तथा १९औं नेपाल ओपन प्याराग्लाइडिङ च्याम्पियनसिप आयोजना हुने भएको छ । नेपाल हवाई खेलकुद संस्था (ना) को आयोजना तथा नेपाल प्याराग्लाइडिङ तथा ह्याण्डग्लाइडिङ संघ तथा नेपाल प्याराग्लाइडिङ पाइलट्स क्लबको सहयोगार्थ ११ देखि १७ फागुनसम्म प्रतियोगिता हुन लागेको हो ।

प्रतियोगितामा ३० राष्ट्रका १ सय २५ जना पाइलटको सहभागिता रहने आइतबार पोखरामा आयोजित पत्रकार सम्मेलनमा जनाइएको हो । जसमा नेपालसहित भारत, बंगलादेश, फ्रान्स, रसिया, बेल्जिमय, अमेरिका काजकास्थान, जापान, कोरिया, इण्डोनेशिया, चीन, इरान, स्वीट्जरल्याण्ड, भियतनाम, जर्मनी लगायत देशका खेलाडीको सहभागिता रहने छ ।

विभिन्न इभेन्ट्सअन्तर्गत ओभरअल च्याम्पियनमा पहिलोदेखि दशौं स्थानसम्मका विजेताले मेडल र ट्रफी प्राप्त गर्नेछन् । यस्तै, महिलातर्फ च्याम्पियनसीपमा पहिलोदेखि पाँचौ स्थानसम्मकाले मेडल र ट्रफी प्राप्त गर्नेछन् ।

नेप्लिज च्याम्पियनमा पाँचौ स्थानसम्मका विजेता र एभ्रि टास्क विनर मेन्स् एण्ड वुमन्स् विजेताले मेडल र ट्रफी पाउने प्रतियोगिता संयोजक योगेश भट्टराईले जानकारी दिए । पोखराको सराङ्कोटदेखि उडान भरी तोकिएको स्थानमा पुगी फेवाताल किनारमा अवतरण गर्ने व्यवस्था मिलाइएको छ ।

प्रतियोगिताको मुल उद्देश्य एशियाका प्याराग्लाइडिङ खेलाडीलाई विश्वकपको सूपर फाइनलमा सोझै प्रवेश दिनका लागि गरिएको हो । विश्वकप सूपर फाइनल सन् २०२१ मा फ्रान्समा हुनेछ । प्रतियोगिताले नेपाल भ्रमण वर्ष २०२० लाई समेत प्रवद्र्धन गर्ने आयोजकको विश्वास छ ।