काठमाडौं (हाम्रो खेलकुद)-  होङ्ग्वान्जी न्यु डायमन्ड स्पोर्ट्स क्लब १५औं सानमिगेल ढोरपाटन महिला डबल लिग भलिबल प्रतियोगिताको शीर्ष स्थानमा उक्लिएको छ । आइतबार आयोजक ढोरपाटन स्पोर्ट्स क्लबलाई ३–० को सोझो सेटमा पराजित गर्दै डायमन्ड शीर्ष स्थानमा उक्लन सफल भएको हो ।

अपराजित रहेको डायमन्डको ४ खेलबाट १२ अंक पुगेको छ । समान खेलबाटै एपिएफको ११ अंक छ । मुख्य स्पाइकर प्रतिभा मालीविनै लिग खेलिरहेको डायमन्डले पहिलो सेटमा २५–१३ को सहज जित निकाल्यो ।

दोस्रो सेटमा पनि २५–१० को सहज जित हात पारेको डायमन्डले तेस्रो सेटमा २५–१६ को जित निकाल्न सफल भयो । तीन भारतीय खेलाडी समेटेपनि ढोरपाटनले न्यु डायमन्डलाई कुनै पनि सेटमा गतिलो चुनौती पेश गर्न सकेन । ढोरपाटनको ३ खेलबाट ६ अंक छ ।

आइतबारै विभागीय नेपाल पुलिस क्लबले दोहोरो जित हात पारेको छ । पुलिसले पहिलो खेलमा चुली युवा क्लबलाई तथा दोस्रो खेलमा पारामान्ट स्कुलमाथि सहज जित निकाल्यो । दोहोरो जितसँगै पुलिसको ४ खेलबाट १० अंक जोडेको छ ।

पुलिसले पहिलो खेलमा चुलीमाथि २५–१०, २५–१० र २५–१४ को सहज जित निकाल्दा दोस्रो खेलमा पारामाउन्टमाथि २५–९, २५–१० र २५–११ को सहज जित निकाल्यो ।
आइतबारै उपाधि दावेदार एपिएफले सेव स्कुलमाथि २५–५, २५–४ र २५–१२ को सहज जित निकाल्यो ।

अर्काे खेलमा त्रिभुवन आर्मी क्लबले बुलबुले रारा भलिबल क्लबको चुनौती ३–० को सोझो सेटमा पन्छायो । एकपक्षीय खेलमा आर्मीले बुलबुलेमाथि २५–२०, २५–१० र २५–२१ को सहज जित निकाल्यो ।

आर्मीले ३ खेलबाट ६ अंक जोड्यो । पहिलो हार बेहोरेको बुलबुलले ४ खेलबाट ९ अंक जोडेको छ । लिगमा पारामाउन्टले ३ अंक जोडेको छ । चुली र सेवले अंक जोड्न सकेको छैन । चितवन टाइग्रेसले एक खेल पनि खेलेको छैन ।
प्रतियोगितामा सोमबार शनिबार लाइट प्रोटेस्टका कारण रोकिएको खेलसँगै ६ खेल हुने आयोजकले जनाएको छ ।