काठमाडौं (हाम्रो खेलकुद) – नेपाली सेनाले आयोजना गर्नै पाँचौ संस्करणको प्रधानसेनापति खुला म्याराथन दौड प्रतियोगिता फागुन पहिलो साता आयोजना हुने भएको छ । आयोजक नेपाली सेनाले बिहीबार राजधानीमा पत्रकार सम्मेलनको आयोजना गर्दै प्रतियोगिताको पाँचौ संस्करण फागुन ३ गते हुने जानकारी गराएको हो ।

सेनाले विगत चार वर्षयता महाशिवरात्री तथा सेना दिवसको अवसर पारेर म्याराथन आयोजना गर्दै आएको छ । प्रतियोगितामा पुरुषको फुल म्याराथन, महिला र पुरुषको हाफ म्याराथन, १० किमिको सैनिक सहचारी, सैनिक अधिकृत र गैर सैनिकको महिला र पुरुष दौडमा प्रतिस्पर्धा हुनेछ । त्यस्तै पाँच किमिको वाकाथन र सैनिक विद्यालयकका छात्रछात्राको लागि पाँच किमीको दौड हुनेछ ।

म्याराथनमा पहिलो हुने खेलाडीले १ लाख २५ हजार रुपैयासँगै एक थान मोटरसाइकल प्राप्त गर्नेछन् । दोस्रोले ६५ हजार, तेस्रोले ३५ हजार, चौथोले २५ हजार, पाँचौले १५ हजार, छैठौले १० हजार, सातौले ७ हजार, आठौंले ५, नवौंले ३ र दशौँले २ हजार पाउने छन् । हाफ म्याराथनतर्फ ४५ वर्षसम्मका पहिलो, दोस्रो र तेस्रो हुने खेलाडीले क्रमशः ५० हजार, ३५ हजार र २५ हजार पाउनेछन् ।

हाफ म्याराथनको ४५ वर्षमाथि उमेर समूहका खेलाडीले ४० हजार, २५ हजार र १५ हजार पाउनेछ । १० किमी दौडमा पहिलो दोस्रो र तेस्रो हुने खेलाडीले क्रमश १० हजार, ७ हजार र पाँच हजार पाउने छन् । पाँच किमिको छात्रछात्रा दौडमा पहिलो हुनेले १० हजार, दोस्रोले सात हजार र तेस्रो हुने खेलाडीले पाँच हजार पाउने छन् ।

सैनिक शारीरिक तथा खेलकुद केन्द्रका केन्द्रपति शशि किरण रायमाझीले नेपाल भ्रमण २०२० लाई लक्षित गरिएको र यसपटक करिव ५ हजार धावक दौडने जनकाी गराए । म्याराथन भद्रकालीस्थित जंगी अड्डाबाट शुरु भएर जगातीबाट फिर्ता हुदै नारायण गोपाल चोक हुदै भद्रकाली आएर टुंगनेछ । हाफ म्याराथन भद्रकालीबाटै शुरु भएर कोटेश्वरबाट नारायण गोपाल चोक हुदै भद्रकाली पुगेर टुंगिनेछ ।