काठमाडौं (हाम्रो खेलकुद) – भलिबलका समर्थकले केहि समयका लागि राष्ट्रिय टोली र होंगान्जी न्यू डायमण्ड स्पोर्टस् क्लबकी स्टार प्रतिभा मालीको खेल हेर्न नपाउने भएका छन् । आरबिबी एनभिए क्लब च्याम्पियनसिपमा शुक्रबार नेपाल एपिएफविरुद्धको फाइनलका दौरान घाइते भएकी प्रतिभा त्यस दिनदेखि त्रिपुरेश्वरस्थित ब्लु क्रस अस्पतालमा भर्ना छिन् ।

उनको चोट कस्तो हो भन्ने अझै एकिन भएको छैन । चोटका कारण यसै साता सुरु हुने ढोरपाटन लिग भलिबलमा न्यू डायमण्ड बाट प्रतिभाको खेल हेर्न नपाइने पक्का भएको छ ।  खेलको तेस्रो सेटमा स्कोर २२–२० को स्थितिमा रहँदा स्पाइक प्रहार गरेपछि ल्यान्डिङ नमिल्दा उनको घुँडामा चोट लागेको थियो । मैदानमा लड्ने बितिक्कै निकै पिडामा रहेपछि उनलाई स्ट्रेचरमा अस्पताल लागिएको थियो ।

सुरुवाती एक्सरे रिपोर्ट अनुसार उनको घुंडाको हड्डीमा कुनै समस्या देखिएको छैन । न्यू डायमण्डका प्रशिक्षक कुमार राईले भने ‘भित्र रगत जमेको हुँदा उनको लिगाम्नेट वा मेनिस्कसमा समस्या रहेको हुनसक्ने आँकलन गरिएको छ । एमआरआईपछि चोटको गम्भिरता र कति समय लाग्ने थाहा हुन सक्छ । ‘

एमआरआईपछि मात्र उनको चोटको अवस्थाका बारेमा बताउन सकिने चिकित्सकहरुले बताएका छन् । उनको घुँडाको एमआरआई सोमबार हुँदैछ । चोटको गाम्भीर्यता हेर्दा उनले केहि महिना विश्राम गर्नुपर्ने देखिएको छ ।

नेपालले कात्तिकमा एभिसी सेन्ट्रल जोनमा स्वर्ण पदक जित्दा र मंसिरमा स्वदेशमा आयोजना भएको १३ औं दक्षिण एसियाली खेलकुद (साग) मा पहिलो पटक रजत पदक जित्दा प्रतिभा टोलीकी महत्वपूर्ण खेलाडी थिइन् ।