पोखरा (हाम्रो खेलकुद)– राष्ट्रिय महिला भलिबल टोलीकी कप्तान अरुणा शाही प्रतिभा वर्ष पुरस्कारबाट शनिबार सम्मानित भएकी छन् । पोखरा नदिपुरस्थित प्रतिभा माविले अरुणालाई १ लाख रुपैयाँसहित सम्मान गरेको हो । अरुणाको कप्तानीमा नेपालले पछिल्ला दुई प्रतियोगितामा सफलता प्राप्त गरेको थियो ।

कात्तिकमा बंगलादेशमा भएको एभिसी एसियन सेन्ट्रल जोनमा स्वर्ण पदक जितेको थियो । त्यस्तै. मंसिरमा स्वदेशमा भएको १३ औं दक्षिण एसियाली खेलकुद (साग) को भलिबलमा रजत पदक जितेको थियो । सागमा नेपालले महिला टोलीले यो अहिले सम्मकै सफल नतिजा हो ।

प्रतिभा माविले हरेक वर्ष गण्डकी प्रदेश भित्रका प्रभिावान युवा सम्मान गर्दै आएको छ । पोखरा महानगरपालिकाका मेयर मानबहादुर जिसीले अरुणालाई सम्मान गरेका थिए । अरुणा सम्मलित होंगान्जी न्यू डायमण्ड स्पोर्टस क्लबले शुक्रबार मात्रै आरबिबी एनभिए महिला क्लब च्याम्पियनसिपमा दोस्रो स्थान प्राप्त गरेको थियो ।

अरुणाले गत वर्ष न्यू डायमण्डबाट दुई प्रतियोगिता खेलेकी थिइन् । यो वर्षपनि उनले न्यू डायमण्डबाट दुई प्रतियोगिता खेलिसकेकी छिन् । गत महिना न्यू डायमण्डले आयोजना गरेको प्रतियोगितामा पनि उनी सोही क्लबबाट खेलेकी थिइन् । त्यसमा पनि न्यू डायमण्ड दोस्रो बनेको थियो । न्यू डायमण्ड दुवै फाइनलमा नेपाल एपिएफ क्लबसँग पराजित भएको थियो ।