काठमाडौं (हाम्रो खेलकुद) – सशस्त्र प्रहरी बल (एपिएफ) क्लब आरबिबी एनभिए पुरुष क्लब च्याम्पियनसिपको फाइनलमा पुगेको छ । विहीबार भएको पहिलो सेमिफाइनल खेलमा एपिएफले आर्मीलाई ३-० को सेटले पराजित गर्दै फाइनलमा पुगेको हो ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हलमा विहीबार भएको सेमिफाइनलमा एपिएफले आर्मीलाई २५-२२, २५-२२, २६-२४ ले पराजित गर्दै फाइनलमा स्थान पक्का गरेको हो । तेस्रो सेटमा एक समय आर्मी २१-१७ ले अघि रहेपनि उक्त अग्रता कायम गर्न नसक्दा सोझो सेटमा पराजित हुन पुगेको हो ।

दोस्रो सेमिफाइनलमा आजनै पुलिस र हेल्प नेपाल स्पोर्टस क्लबबीच प्रतिस्पर्धा हुनेछ । जसको विजेताले एपिएफसँग उपाधिको लागि शुक्रबार प्रतिस्पर्धा गर्ने छ । पराजित हुने टोली र आर्मीसँग तेस्रो स्थानको लागि भिड्ने छन् ।

आजनै भएको महिला सेमिफाइनलमा न्यू डायमण्ड र एपिएफ फाइनलमा पुगेका छन् । न्यू डायमण्डले त्रिभुवन आर्मी क्लब र एपिएफले नेपाल पुलिसलाई हराउँदै फाइनलमा प्रवेश गरेका हुन् । महिलाको फाइनल पनि शुक्रबार हुने छ ।

नेपाल भलिबल संघ (एनभिए) को आयोजना तथा राष्ट्रिय वाणिज्य बैंक (आरबिबी) को मुख्य प्रायोजनमा जारी प्रतियोगिताको यो पाँचौं संस्करण हो । प्रतियोगिताका दुवैतर्फका विजेताले २ लाख, दोस्रो हुने टोलीले १ लाख र तेस्रो टोलीले ५० हजार रुपैयाँ प्राप्त गर्नेछ । त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन् ।