काठमाडौं (हाम्रो खेलकुद) – न्यू डायमण्ड आरबिबी एनभिए महिला क्लब च्याम्पियनसिपको फाइनलमा पुगेको छ । विहीबार भएको दोस्रो सेमिफाइनलमा विभागीय टोली त्रिभुवन आर्मी क्लबलाई ३-० को सेटमा पराजित गर्दै न्यू डायमण्डले पुन फाइनलमा एपिएफसँग उपाधिको लागि भेट पक्का गरेको हो ।

त्रिपुरेश्वरस्थित राष्ट्रिय खेलकुद परिषद् (राखेप) न्यू डायमण्डले आर्मीलाई २५-१५, २५-२२ र २५-१३ ले पराजित गर्यो । पहिलो सेटमा न्यू डायमण्डले सहज जित निकालेको थियो ।

दोस्रो सेटमा प्रतिस्पर्धात्मक खेल भएको थियो । एक समय दोस्रो सेटमा २१-२१ को बराबरी अवस्थामा पुगेको थियो । उक्त अवस्थाबाट प्रतिभा मालीले न्यू डाइमण्डलाई लगातार तीन अंकको अग्रता दिलाउँदै जित पक्का गरिन् । तेस्रो सेटमा न्यु डायमण्डले सुरुवाती देखिनै अग्रता लिदै सहज जित पक्का गरे । प्रतिभाको प्रर्दशन उत्कृष्ट रह्यो ।

आजनै भएको पहिलो सेमिफाइनल खेलमा एपिएफले नेपाल पुलिस क्लबलाई ३–० को सोझो सेटमा हराउँदै फाइनलमा पुगेको हो । पहिलो सेमिफाइनलमा एपिएफले पुलिसलाई २५–१५,२५–१६ र २५–२२ ले हराएको थियो । फाइनल शुक्रबार हुने छ । तेस्रो स्थानको लागि आर्मी र पुलिस भिड्ने छन् ।

आजै हुने पुरुषतर्फको सेमिफाइनलमा आर्मी र एपिएफल तथा पुलिस र हेल्प नेपाल स्पोर्टस क्लबबीच प्रतिस्पर्धा हुनेछ । नेपाल भलिबल संघ (एनभिए) को आयोजना तथा राष्ट्रिय वाणिज्य बैंक (आरबिबी) को मुख्य प्रायोजनमा जारी प्रतियोगिताको यो पाँचौं संस्करण हो ।

प्रतियोगिताका दुवैतर्फका विजेताले २ लाख, दोस्रो हुने टोलीले १ लाख र तेस्रो टोलीले ५० हजार रुपैयाँ प्राप्त गर्नेछ । त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन् ।