काठमाडौं (हाम्रो खेलकुद)– हेल्प नेपाल स्पोर्टस् क्लब अघिल्लो चरण पुगेसँगै आरबिबी एनभिए पुरुष क्लब च्याम्पियनसिपको सेमिफाइनल सेमिकरण पुरा भएको छ । बुलबुले रारा क्लबलाई बुधबार ३–० को सेटमा हराउँदै हेल्प नेपाल सेमिफाइनल पुगेपछि समिकरण पुरा भएको हो ।

यसअघि तीन विभागिय टोली त्रिभुवन आर्मी क्लब, नेपाल एपिएफ क्लब र नेपाल पुलिस क्लबले अन्तिम चारमा स्थान बनाइसकेका छन् । अब बिहीबार हुने सेमिफाइनलमा दुई विभागिय टोली आर्मी र एपिएफ तथा पुलिस र हेल्प नेपालबीच प्रतिस्पर्धा हुनेछ ।

त्रिपुरेश्वरस्थित राष्ट्रिय खेलकुद परिषद् (राखेप) कभर्ड हलमा भएको खेलमा हेल्प नेपालले बुलबुले रारालाई २५–१६,२५–२० र २५–१९ ले हराएको थियो । त्यसअघि पुलिसले नयाँ बजार सामाजिक क्लबलाई लाई २५–११,२५–९ र २५–१२ ले हराएको थियो ।

एपिएफले बुद्ध टोललाई २५–१८,२५–१७ र २५–११ ले पराजित गरेको थियो । साविक विजेता आर्मीले मणिमुकुन्द भलिबल क्लबलाई २५–१९,२५–१८ र २५–१७ ले माथ दिएको थियो ।

नेपाल भलिबल संघ (एनभिए) को आयोजना तथा राष्ट्रिय वाणिज्य बैंक (आरबिबी) को मुख्य प्रायोजनमा जारी प्रतियोगिताको यो पाँचौं संस्करण हो । महिलातर्फ भने आज कुनै खेल छैनन् ।

पुरुष र महिला दुवैतफैको सेमिफाइनल बिहीबार र फाइनल शुक्रबार हुनेछन् । महिलातर्फको सेमिफाइनलमा साविक विजेता नेपाल एपिएफ र नेपाल पुलिस क्लब तथा होंगान्जी न्यू डायमण्ड स्पोर्टस् क्लब र त्रिभुवन आर्मी क्लबबीच प्रतिस्पर्धा हुनेछ ।

प्रतियोगिताका दुवैतर्फका विजेताले २ लाख, दोस्रो हुने टोलीले १ लाख र तेस्रो टोलीले ५० हजार रुपैयाँ प्राप्त गर्नेछ । त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन् ।

बिहीबार क्लब च्याम्पियनसिपका सेमिफाइनल खेल

पुरुषतर्फ

• आर्मीविरुद्ध एपिएफ – बिहान ९ः३० बजे
• पुलिसविरुद्ध हेल्प नेपाल – बिहान ११ः३० बजे

महिलातर्फ

• एपिएफविरुद्ध पुलिस – दिउँसो १ः०० बजे
• आर्मीविरुद्ध होंगान्जी न्यू डायमण्ड – दिउँसो ३ः०० बजे