काठमाडौं (हाम्रो खेलकुद)– पाँचौं आरबिबी एनभिए भलिबल क्लब च्याम्पियनसिपमा सोमबार पुरुषतर्फ त्रिभुवन आर्मी क्लब र बुलबुले रारा क्लब विजयी भएका छन् । महिलातर्फ नेपाल पुलिस क्लब र भरतपुर मेट्रो खेलकुद परिषद् (बिएमसी) ले सफलता हासिल गरेका थिए ।

महिलातर्फ ढोरपाटन स्पोर्टस क्लबलाई हराउँदै पुलिस क्लब अन्तिम चारमा पुगेको छ । पुलिसले ढोरपाटन स्पोर्टस् क्लबलाई २५–५, २५–१५, २५–८ ले पराजित गर्दै अन्तिम चरणमा स्थान पक्का गरेको हो ।

पहिलो खेलमा होंगान्जी न्यू डायमण्डसँग ३–२ ले पराजित भएको पुलिस ४ अंकसहित अघिल्लो चरणमा प्रवेश गरेको हो । पहिलो खेल जितेको न्यू डायमण्डले भने अर्को अघिल्लो चरण प्रवेशका लागि अर्को खेलको नतिजा कुर्नुपर्ने भएको छ ।

न्यू डायमण्ड र ढोरपाटनबीच हुने खेलको नतिजाले समूहको विजेता, उपविजेताको टुंगोका साथै सेमिफाइनल पुग्ने अर्को टोलीको टुंगो लगाउने छ । न्यू डायमण्डको २ अंक छ भने ढोरपाटन अंक विहिन छ ।

महिलातर्फकै अर्को खेलमा समूह चरणबाट बाहिरिएको बिएमसीले २५–८, २५–९, २५–१५ ले हरायो । जावलाखेलपछि प्रतियोगितबाट बाहिरि सकेको छ । त्यो समूहबाट दुई विभाग साविक विजेता एपिएफ र आर्मी क्लब अन्तिम चारमा पुगिसकेका छन् ।

त्रिपुरेश्वरस्थित राष्ट्रिय खेलकुद परिषद (राखेप) कभर्डहलमा भएको प्रतियोगितामा यसअघि नै अन्तिम आठमा पुगेको साविक विजेता आर्मीले नयाँबजार सामाजिक युवा क्लब लाई २५–१५, २५–१७, २५–१७ को सोझो सेटले हराउँदै समूह विजेता बन्यो ।

अघिल्लो चरण पुगिसकेको नयाँ बजार समूह उपविजेता बन्यो । आरजी भलिबल ग्रुप यो समूहबाट बाहिरिसकेको छ । समूह ‘बि’ को खेलमा बुलबुलेले जावलाखेललाई २५–१५, २५–२१, २५–१० ले हरायो ।

मंगलबार लिग चरणको अन्तिम दिन

पुरुष तर्फ

समूह ‘बी’ एपिएफ र जावलाखेल– बिहान ९ः३० बजे

समूह ‘सी’ पुलिसविरुद्ध मणिमुकुन्द – बिहान ११ः ३० बजे

महिला तर्फ

समूह ‘ए’ एपिएफविरुद्ध आर्मी – दिउँसो १ः३० बजे

समूह ‘बी’ न्यू डायमण्डविरुद्ध ढोरपाटन ३ः३० बजे