काठमाडौं (हाम्रो खेलकुद)– नेपाल एपिएफ क्लब लगातार तेस्रो पटक होङ्गान्जी न्यु डायमण्ड राष्ट्रिय खुला महिला भलिबल प्रतियोगिताको फाइनलमा पुगेको छ । न्यु डायमण्ड र त्रिभुवन आर्मी क्लबबीचको विजेतासँग एपिएफले आइतबार उपाधिका लागि प्रतिस्पर्धा गर्नेछ ।

गोंगाबु बालाजु बसपार्क नजिकको कोर्टमा अर्को विभागिय टोली नेपाल पुलिस क्लबलाई शनिबार पहिलो सेमिफाइनलमा ३–० को सोझो सेटमा हराउँदै एपिएफ तेस्रो पटक उपाधि नजिक पुगेको हो । घरेलु भलिबलमा एक छत्र राज गर्दै आएको एपिएफले पुलिसलाई २५–१४,२५–१८,२५–१७ ले हराउँदै फाइनल पुगेको हो । एपिएफ समूह चरणका तीन खेलमा पनि अपराजित रहेको थियो । पुलिस क्लब समूह बीको उपविजेताका रुपमा अन्तिम चारमा पुगेको थियो ।

यसअघिका दुई संस्करणमा एपिएफले एक पटक उपाधि जितेको थियो भने अर्को पटक फाइनलमा पराजय भोगेको थियो । न्यु डायमण्ड कप फाइनल यसअघि दुवै पटक एपिएफ र आयोजक न्यु डायमण्ड स्पोर्टस क्लबबीच भएको थियो । पहिलो संस्करणमा न्यु डायमण्डले उपाधि जितेको थियो । दोस्रोमा एपिएफ च्याम्पियन बन्यो ।

यसपटक पनि एपिएफ र न्यु डायमण्ड अपराजित छन् । आजै हुने अर्को सेमिफाइनलमा न्यु डायमण्डले अर्को विभागिय टोली त्रिभुवन आर्मी क्लबको सामना गर्नेछ । न्यु डायमण्ड समूह बीको विजेता र आर्मी समूह एको उपविजेताका रुपमा अन्तिम चारमा पुगेका थिए ।

मुख्य प्रायोजक होङ्गान्जी बौद्ध समाज नेपाल रहेको प्रतियोगिताको विजेताले ४ लाख १ हजार १ रुपैयाँ , दोस्रो हुने टोलीले ३ लाख १ हजार १ सय रुपैयाँ प्राप्त गर्नेछ । तेस्रो हुनेले टोलीले १ लाख ५१ हजार १ सय १ रुपैया तथा चौथो हुनेले ५१ हजार १ सय १ रुपैयाँ प्राप्त गर्नेछ ।

प्रतियोगिताको सर्वोत्कृष्ट खेलाडीले २१ हजार १ सय १ रुपैया प्राप्त गर्नेछन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ पाउनेछन् ।