काठमाडौं (हाम्रो खेलकुद)– दुई विभागिय टोली नेपाल एपिएफ क्लब र त्रिभुवन आर्मी क्लब होङ्गान्जी न्यु डायमण्ड खुला महिला भलिबल प्रतियोगिताको सेमिफाइनलमा पुगेका छन् ।

बालाजु बसपार्क नजिक भलिबल कोर्टमा जारी प्रतियोगिताको समूह ‘ए’ मा समान दुई खेल जित्दै साविक विजेता एएिफ र आर्मी अन्तिम चारमा पुगेका हुन् ।

पारामाउन्ट बोर्डिङ स्कुललाई बिहीबार एपिएफले २५–१८,२५–५ र २५–९ ले हराएपछि टोलीसँगै आर्मी पनि सेमिफाइनल पुगेको हो । आर्मीले यसअघि नै पारामाउन्ट र पोखराको टप्स माविलाई हराएको थियो । एपिएफले पनि टप्सलाई यसअनि नै हराइसकेको थियो ।

पारामाउन्ट र टप्स प्रतियोगिताबाट बाहिरिएका छन् । अब आज दुई विभागिय टोलीबीच समूह विजेताका लागि प्रतिस्पर्धा हुँदैछ । बिहीबार यी दुई टोलीबीचको खेल खराब प्रकाशका कारण रद्द भएको थियो । पहिलो सेट एपिएफले आफ्नो पक्षमा पारेको अवस्थामा खेल रोक्नु परकोे थियो ।

अर्को समूहबाट आयोजक न्यु डायमण्ड स्पोर्टस क्लब विजेता र नेपाल पुलिस क्लब उपविजेताका रुपमा सेमिफाइनल पुगिसकेका छन् । आजै भएको समूह चरणको अन्तिम खेलमा पुलिसलाई २५–१९,२५–२३,१७–२५,१६–२५ र १५ –६ ले हराउँदै न्यु डायमण्ड समूह विजेता बनेको थियो । समूह एको विजेताले पुलिस र उपविजेताले न्यु डायमण्डसँग शनिबार सेमिफाइनल खेल्नेछ ।

मुख्य प्रायोजक होङ्गान्जी बौद्ध समाज नेपाल रहेको प्रतियोगिताको विजेताले ४ लाख १ हजार १ रुपैयाँ , दोस्रो हुने टोलीले ३ लाख १ हजार १ सय रुपैयाँ प्राप्त गर्नेछ । तेस्रो हुनेले टोलीले १ लाख ५१ हजार १ सय १ रुपैया तथा चौथो हुनेले ५१ हजार १ सय १ रुपैयाँ प्राप्त गर्नेछ ।

प्रतियोगिताको सर्वोत्कृष्ट खेलाडीले २१ हजार १ सय १ रुपैया प्राप्त गर्नेछन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ पाउनेछन् ।