काठमाडौं (हाम्रो खेलकुद)– आयोजक न्यु डायमण्ड स्पोर्टस क्लब होङ्गान्जी न्यु डायमण्ड खुला महिला भलिबल प्रतियोगिताअन्तर्गत समूह बीको विजेता बनेको छ । दुई सेमिफाइन पुगिसकेका टोलीबीच शुक्रबार भएको रोमाञ्चक प्रतिस्पर्धामा विभागिय टोली नेपाल पुलिस क्लबमाथि ३–२ को जित निकाल्दै न्यु डायमण्ड समूहको विजेता बनेको हो ।

समूहको अर्को टोली ढोर पाटनलाई हराउँदै पुलिस र न्यु डायमण्ड यसअघि नै सेमिफाइनलमा पुगिसकेका थिए । सेमिफाइनलमा सम्भावित बलियो टोलीलाई छल्नका लागि पनि आजको खेल महत्वपूर्ण थियो । जसमा न्यु डायमण्डले बाजीमा मारेको छ । अब समूह एको उपविजेताले न्यु डायमण्ड र समूह एको विजेताले पुलिसको सामना गर्नेछ ।

अन्तिम तथा निर्णायक सेटमा उच्च प्रदर्शन गर्दै न्यु डायमण्डले पुलिसलाई निराश पारेको हो । अन्तिम सेट डायमण्डले १५–६ ले जितेको थियो । त्यसअघि सुरुवाती दुई सेट न्यु डायमन्डले जितेपनि तेस्रो र चौथो सेट पुलिसले आफ्नो पक्षमा पारेको थियो । रोमाञ्चक मोडमा पुगेको खेलको अन्तिम सेटमा भने पुलिस निकै कमजोर देखियो । खेल अन्ततः न्यु डायमन्डले २५–१९,२५–२३,१७–२५,१६–२५ र १५ –६ ले आफ्नो पक्षमा पारेको थियो । प्रतियोगिताको पहिलो दिन यी दुई टोलीबीचको खेल चौथो सेटमा पुगेर खराब प्रकाशका कारण रद्द भएको थियो । त्यति बेला न्यु डायमन्ड २–१ ले अगाडि थियो ।

बालाजु बसपार्क नजिकको भलिबल कोर्टमा जारी प्रतियोगितामा बिहीबार खराब प्रकाशका कारण रद्द भएको नेपाल एपिएफ क्लब र त्रिभुवन आर्मी क्लबको बीचको खेल आज हुनेछ । त्यसअघि समूहको अर्को खेलमा एपिएफले पारामाउन्ड बोर्डिङ स्कुलको सामना गर्नेछ । समूह एमा आर्मीले दुई खेल जितेको छ भने एपिएफले १ खेलमा एक जित हासिल गरेको छ । दुई विभागिय टोलीबीच आज हुने समूह चरणको अन्तिम खेल समूह विजेता र उपविजेता चुन्नका लागि महत्वपूर्ण हुने सम्भावना छ ।

मुख्य प्रायोजक होङ्गान्जी बौद्ध समाज नेपाल रहेको प्रतियोगिताको विजेताले ४ लाख १ हजार १ रुपैयाँ , दोस्रो हुने टोलीले ३ लाख १ हजार १ सय रुपैयाँ प्राप्त गर्नेछ । तेस्रो हुनेले टोलीले १ लाख ५१ हजार १ सय १ रुपैया तथा चौथो हुनेले ५१ हजार १ सय १ रुपैयाँ प्राप्त गर्नेछ ।प्रतियोगिताको सर्वोत्कृष्ट खेलाडीले २१ हजार १ सय १ रुपैया प्राप्त गर्नेछन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ पाउनेछन् ।