काठमाडौं (हाम्रो खेलकुद)– आयोजक ललितपुर महानगरपालिका महानगर कप भलिबल प्रतियोगिताको पुरुष र महिला दुवैतर्फको उपाधिका लागि भिड्ने भएको छ ।

ललितपर र चौतारा नगरपालिकाबीच पुरुषतर्फको फाइनल हुने भएको छ । यसअघि नै महिलातर्फको उपाधिका लागि चन्द्रागिरी नगरपालिका र ललितपुर तय भइसकेको थियो । जावलाखेल भलिबल प्रशिक्षण केन्द्रमा बिहीबार भएको सेमिफाइनलमा जित निकाल्दै ललितपुर र चौताराले एक अर्कासँगको भेट पक्का गरेका हुन् ।

चौताराले महालक्ष्मी नगरपालिकालाई २५–१४, ३५–३३, १८–२५ र २५–१७ ले हराउँदै अन्तिम दुईको यात्रा तय गरेको हो । अर्को सेमिफाइनलमा ललितपुरले कमलामाई नगरपालिकालाई २५–१५, २५–१५ र २५–८ को सोझो सेटमा हराएको थियो । महिला र पुरुष दुवैको फाइनल खेल शुक्रबार हुनेछ ।

प्रतियोगिताको महिला र पुरुष दुवैको विजेताले २ लाख, दोस्रो टोलीले १ लाख रुपैयाँ प्राप्त गर्नेछन् । त्यस्तै तेस्रो टोलीले ५० हजार र चौंथोले २५ हजार रुपैयाँ प्राप्त गर्नेछन् ।

सेमिफाइनलमा पुग्ने टोलीले समान १५ हजार रुपैयाँ पाउनेछन् । दुवैतर्फका सर्वोत्कृष्ट खेलाडीले १० हजार तथा व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले जनही ५ हजार रुपैयाँ पाउनेछन् ।