काठमाडौं (हाम्रो खेलकुद)– आयोजक न्यु डायमण्ड क्लब र नेपाल पुलिस क्लब होङ्गान्जी न्यु डायमण्ड खुला महिला भलिबल प्रतियोगिताको सेमिफाइनलमा पुगेका छन् ।

बालाजु बसपार्क नजिकको भलिबल कोर्टमा बिहीबार समूह चरणका दुवै खेलमा पराजित हुँदै ढोरपाटन स्पोर्टस क्लब भने जारी प्रतियोगिताबाट बाहिरिएको छ । बिहान पुलिससँग पराजित भएको ढोरपाटन दिउँसो न्यु डायमण्डसँग हारेको थियो ।

पुलिसले ढोरपाटनमाथि २५–१२, २७–२५ र २५–१० को जित निकालेको थियो । अर्को खेलमा न्यू डायमण्डले ढोरपाटनलाई २५–५,२५–१२ र २५–११ ले हराएको थियो । समूह ‘बी’ मा अब पुलिस र न्यू डायमण्डको नजिताले समूह विजेता र उप विजेताको टुंगो लाग्नेछ । यी दुई टोलीबीच बुधबार चौथो सेटमा पुगेर वर्षाका कारण खेल रद्द भएको थियो ।

बिहीबार नै भएको अर्को खेलमा नेपाल त्रिभुवन आर्मी क्लबले पोखराको टप्स माविलाई सहजै हरायो । आर्मी २५–१३,२५–१६ र २७–७ ले विजयी भएको थियो । समूह ‘ए’ मा आर्मीको यो दोस्रो जित हो । बुधबार पारामाउन्टलाई हराएको थियो । टप्सको भने यो दोस्रो हार हो ।

पहिलो दिन टोली साविक विजेता नेपाल एपिएफ क्लबसँग पराजित भएको थियो । वर्षाका कारण बिहीबार केहि समय खेल प्रभावित भएको थियो । वर्षाका कारण पहिलो दिन तय भएका ४ खेलमध्ये २ खेलमात्र भएका थिए ।

प्रतियोगिता १ दिन पछि परेको छ । अब आइतबार फाइनल हुनेछ । शुक्रबार समूह चरणका बाँकी खेल तथा शनिबार सेमिफाइनल हुने आयोजकले जनाएको छ ।

मुख्य प्रायोजक होङ्गान्जी बौद्ध समाज नेपाल रहेको प्रतियोगिताको विजेताले ४ लाख १ हजार १ रुपैयाँ , दोस्रो हुने टोलीले ३ लाख १ हजार १ सय रुपैयाँ प्राप्त गर्नेछ । तेस्रो हुनेले टोलीले १ लाख ५१ हजार १ सय १ रुपैया तथा चौथो हुनेले ५१ हजार १ सय १ रुपैयाँ प्राप्न गर्नेछ ।

प्रतियोगिताको सर्वोत्कृष्ट खेलाडीले २१ हजार १ सय १ रुपैया प्राप्त गर्नेछन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ पाउनेछन् ।