काठमाडौं (हाम्रो खेलकुद) – सिन्धुपाल्चोकको चौतारा नगरपालिका ललितपुरमा जारी प्रदेश ३ स्तरीय महानगर कप महिला र पुरुष भलिबल प्रतियोगिता अन्तर्गत पुरुषतर्फको क्वाटरफाइनलमा प्रवेश गरेको छ ।

जावलाखेल भलिबल प्रशिक्षण केन्द्रमा सोमबार भएको खेलमा भक्तपुर नगरपालिकालाई ३–० को सेटमा पराजित गर्दै चौतारा समूह ‘एु’ को विजेता बन्दै क्वाटरफाइनलमा पुग्न सफल भएको हो । चौताराले २ खेलबाट ६ अंक जोड्यो । यही समूहबाट ४ अंक जोडेको ललितपुर समूह उपविजेता बन्दै अन्तिम आठमा पुग्न सफल भयो । भक्तपुर भने प्रतियोगिताबाट बाहिरिएको छ ।

पुरुषतर्फ नै महालक्ष्मी नगरपालिका र पनौती नगरपालिकाले क्वाटरफाइनलमा स्थान बनाए । यो समूहबाट टोखा बाहिरिने टोली बन्यो ।
समूह ‘डी’ मा कमलामाई नगरपालिकाले गोदावारीलाई पराजित गर्दै लगातार दोस्रो जित निकाल्यो । यस्तै गोकर्णेश्वरले धुलिखेललाई सोझो सेटमा हरायो ।

महिलातर्फ चन्द्रागिरीले बनेपालाई तथा गोकर्णेश्वरले हेटौडालाई समान ३–० को सोझो सेटमा हरायो । यस्तै विदुरले टोखालाई ३–१ को सेटमा पाखा लगायो ।

ललितपुर महानगरपालिकाको आयोजनामा जारी प्रतियोगितामा पुरुषमा १३ र महिलामा ८ टिमले प्रतिस्पर्धा गरिरहेका छन् । ललितपुर महानगरपालिकाको १ सय १ औं स्थापना दिवसको अवसरमा जारी प्रतियोगिताको महिला र पुरुष दुवैको विजेताले २ लाख, उपविजेताले १ लाख र तेस्रोले ५० हजार पाउने छन् । यस्तै चौंथोले २५ हजार पाउने छ । सेमिफाइनलमा पुग्ने टिमले १५/१५ हजार पाउने छन् ।

यस्तै महिला र पुरुष दुवैको सर्वोकृष्ट खेलाडीले १० हजार पाउँदा व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले जनही ५र५ हजार पाउने छन् ।