काठमाडौं (हाम्रो खेलकुद) – नेपाली भलिबलका स्टार खेलाडी मानबहादुर श्रेष्ठ हाल माल्दिभ्सको लिगमा व्यस्त छन् । उनी लगातार दोस्रो सिजन माल्दिभ्स लिग खेल्ने क्रममा गुडिस क्लबबाट खेलिरहेका छन् ।

नेपालमा विभागीय त्रिभुवन आर्मी क्लबका स्पाइकर मानबहादुर श्रेष्ठ सम्मिलित गुडिस स्पोर्ट्स क्लबले सोमबार दोस्रो राउन्डमा दोस्रो जित निकालेको छ । मानबहादुरले उक्त जित नेपालमा रहेकी आफ्नो छोरीलाई समर्पित गरे । लगातार दोस्रो वर्ष भलिबल खेल्नकै कारण देशबाहिर रहेका उनले छोरीको जन्मदिन मनाउन पाएनन् ।

‘ आजको जित छोरीलाई जन्मदिनको उपहारको रुपमा सुम्पेको छु । भलिबल खेल्नकै कारण लगातार दोस्रो वर्ष छोरीको जन्मदिन मनाउन पाइएन,’ उनले हाम्रोखेलकुदसँग भने, ‘ खेलाडी भएपछि बिरलै आउने यस्तो अवसर छोड्ने कुरा पनि भएन । अब नेपाल फर्किएर जन्मदिन मनाउने योअजना बनाएको छु ।’ मानबहादुरले पूर्व भलिबल खेलाडी लिसा थापासँग प्रेम विवाह गरेपछि दुई वर्षअघि पुत्रीलाभ भएको थियो ।

माल्दिभ्सको मालेस्थित सोसियल सेन्टर इन्डोर हलमा सोमबार भएको दोस्रो राउन्डको अन्तिम खेलमा स्पोर्ट्स क्लब सिटीलाई सोझो सेटमा पराजित गरेको हो । एकपक्षीय खेलमा गुडिसले २५–१३, २५–१२ र २५–१५ को सहज जित निकाल्यो । गुडिसको समग्रमा यो पाँचौ जित हो । गुडिसले ७ खेलमध्ये ५ र जित र दुई खेलमा हार बेहोर्‍यो ।

जितसँगै गुडिसले दोस्रो राउन्डमा तेस्रो भएको छ । अब गुडिसले सेमिफाइनल प्रवेशका लागि पुनः स्पोर्ट्स क्लब सिटीसँग नै खेल्नेछ ।
त्यसपछि फाइनल प्रवेशका लागि धिवेही सिफेंगे क्लब र पुलिसबीच प्रतिस्पर्धा हुनेछ । पहिलो सेमिफाइनलमा पराजित र दोस्रो इलिमेटरबीचको विजेताले शुक्रबार पुनः फाइनल प्रवेशका लागि प्रतिस्पर्धा गर्नेछ । फाइनल आइतबार हुनेछ ।

मानबहादुरले अघिल्लो सिजन स्पोर्टस् क्लब सिटीबाट खेलेका थिए । माल्दिभ्स भलिबल लिगमा सहभागी टिमले दुई विदेशी खेलाडी राख्न पाइने प्रावधान अनुसार मानबहादुर गुडिसमा आबद्ध भएका हुन् ।

डिसेम्बर २५ देखि शुरु भएको माल्दिभ्सको लिगमा पहिलो राउन्डमा ५ तथा दोस्रो राउन्डमा चार टोलीले प्रतिस्पर्धा गरेका थिए ।