ललितपुर (हाम्रो खेलकुद)- आयोजक ललितपुर महानगरपालिका र गोदावरी नगरपालिकाले शनिबारदेखि सुरु भएको प्रदेश ३ स्तरीय महानगर कप महिला तथा पुरुष भलिबल प्रतियोगिता अन्तरगत पुरुषतर्फ विजयी सुरुवात गरेका छन् । जावलाखेलस्थित जावलाखेल भलिबल प्रशिक्षण केन्द्रमा शनिबार भएको पहिलो खेलमा ललितपुर महानगरपालिकाले भक्तपुर नगरपालिकालाई ३–१ को सेटमा पराजित गर्दै वियजी सुरुवात गरेको हो ।

यस्तै कागेश्वरी मनहरा नगरपालिकाले कीर्तिपुर नगरपालिकालाई ३–० को सोझो सेटमा हरायो । तेस्रो खेलमा गोदावरीले धुलिखेल नगरपालिकालाई ३–० को सोझो हरायो । ललितपुरककै गोदावरी नगरपालिकाले धुलिखेललाई ३–० को सोझो सेटमा हरायो । महिलातर्फ पहिलो दिन कुनै पनि खेल हुन सकेन । बनेपा नगरपालिकाले गुप्तेश्वर नगरपालिकाबाट वाक ओभर पायो । चन्द्रागिरी नगरपालिका र आयोजक ललितपुर महानगरपालिकाको खेल वर्षाका कारण शुरु हुन सकेन ।

प्रतियोगितामा पुरुषतर्फ १३ र महिलाको ८ गरी २१ टिमको सहभागिता रहने आयोजकले जनाएको छ । प्रतियोगितामा प्रदेश ३ को महानगरपालिका, उपमहानगरपालिका तथा नगरपालिको टिमले लिग कम नकआउटका आधारमा प्रतिस्पर्धा गर्नेछन् । प्रतियोगितामा विभागीय टिम र राष्ट्रिय टिमबाट खेलेका खेलाडीले भने सहभागिता जनाउन नपाउने आयोजकले जनाएको छ ।

प्रतियोगिताको महिला र पुरुष दुवैको विजेताले २ लाख, उपविजेताले १ लाख र तेस्रोले ५० हजार पाउने छन् । यस्तै चौंथोले २५ हजार पाउने छ । यस्तै महिला र पुरुष दुवैको सर्वोकृष्ट खेलाडीले १० हजार रुपैया पाउनेछन् । व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले क्रमश ५–५ हजार पाउने छन् ।