काठमाडौं (हाम्रो खेललकुद)- १३औं दक्षिण एसयाली खेलकुद (साग) मा दोहोरो स्वर्ण जित्न सफल सुवास तामाङले बुधबादेखि शुरु भएको फाल्डो सिरिज जुनियर गल्फमा अग्रता बनाएका छन्।

गोकर्ण गल्फ क्लबमा पहिलो दिनको खेल सकिदा सुवासले ३ अन्डर ७१ स्कोर गर्दै अग्रता लिन सफल भएका हुन् । रितेश तामाङ ३ अन्डर ७५ स्कोरसहित दोस्रो स्थानमा रहेका छन् । यस्तै १७ देखि २१ वर्षको उमेर समूहमा भारतका अभिराजसिंह चौहानले ४ अण्डर ७६ स्कोरसहित अग्रता बनाएका छन् ।

१५ ओभर ८७ स्कोरसहित सुदिप तामाङ दोस्रो स्थानमा रहेका छन् । १२ देखि १६ वर्ष उमेर समूहमा सद्भाव आचार्यले ६ ओभर ७६ स्कोर बनाएका छन् । शास्वत प्रधानले १८ ओभर ९० स्कोर बनाएका छन् । गल्र्सतर्फ कश्मिरा शाहले १३ ओभर ८५ स्कोर बनाएकी छिन् । प्रतिभा राई र रबिन श्रेष्ठले २१ ओभर ९३ स्कोर जोडेका छन् ।

नेपाल गल्फ एसोसियसनले आयोजना गरेको फाल्डो सिरिज ५४ होलमा पुस १८ गतेसम्म संचालन हुनेछ । निक फाल्डोले १९९६ मा युवा गल्फर खेलाडी उत्पादन गर्ने उद्देश्यले यसको शुरुवात गरेका थिए । अहिले यो सिरिज २७ देशमा आयोजना हुदै आएको छ । सिरिजमा महिला पुरुषका १२ देखि २१ वर्ष उमेर समूहका खेलाडीहरुले प्रतिस्पर्धा गर्नेछन् ।

सिरिजमा साबिकको विजेता तथा १३औं सागका स्वर्णधारी सुवास तामाङसहित २० खेलाडीले प्रतिस्पर्धा गर्नेछन् । सिरिजमा ४ महिला खेलाडीको पनि सहभागिता रहेको छ । पछिल्लो ६ बर्षबाट बार्षिक हुँदै आएको यस प्रतियोगिता फाल्डो सिरिज एसियाको छनोटको रुपमा रहेको छ ।

सिरिजको १७ देखि २१ र १२ देखि १६ वर्षको उमेर समूहको गर्ल्स र ब्वाइज विजेताले भियतनामको लगुना लङ दानङ गल्फ कोर्षमा सन् २०२० मा हुने फाल्डो सिरिज एसियाको फाइनल चरणका लागि छनोट हुनेछन् ।