काठमाडौं (हाम्रो खेलकुद) – नेपाली राष्ट्रिय पुरुष भलिबल टिम तथा विभागीय त्रिभुवन आर्मी क्लबका स्पाइकर मानबहादुर श्रेष्ठसम्मिलित गुडिस स्पोर्ट्स क्लबले माल्दिभ्सको राष्ट्रिय भलिबल लिगमा तेस्रो जित निकालेको छ ।

माल्दिभ्सको मालेस्थित सोसियल सेन्टर इन्डोर हलमा आइबार राति भएको खेलमा मानबहादुर सम्मिलित गुडिस स्पोर्ट्स क्लबले स्पोर्टस् क्लब सिटीलाई ३–० को सोझो सेटमा पराजित गर्दै तेस्रो जित निकाल्न सफल भएको हो ।

निकै नै प्रतिस्पर्धात्मक बनेको पहिलो सेटमा गुडिसले ३१–२९ को कठिन जित निकालेको थियो । तर, त्यसपछिको दुवै सेटमा गुडिसले २५–१८ र २५–१० को सहज जित निकाल्न सफल भयो ।

यसअघि गुडिसले पहिलो खेलमा स्पोर्ट्स क्लब हक्सलाई २५–१५, २५–१७ र २५–१९ ले पराजित गरेको थियो । दोस्रो खेलमा गुडिस दिहेवी सिफेंगे क्लबसँग २५–१७, २५–१९ र २५–२१ को सोझो सेटमा पराजित भएको थियो । तेस्रो खेलमा पुलिस क्लबलाई ३–१ को सेटमा पराजित गरेको थियो ।

मानबहादुरले अघिल्लो सिजन स्पोर्टस् क्लब सिटीबाट खेलेका थिए । माल्दिभ्स भलिबल लिगमा सहभागी टिमले दुई विदेशी खेलाडी राख्न पाइने प्रावधान अनुसार मानबहादुर गुडिसमा आबद्ध भएका हुन् । चार खेलमध्ये तीन खेलमा जित हात पारेपछि गुडिस डबल लिगो दोस्रो राउन्डमा प्रवेश गरेको छ ।

पहिलो राउन्डपछि एक टोली प्रतियोगिताबाट बाहिरिने छ । दोस्रो राउन्डमा शीर्ष चार टोलीले खेल्नेछन् । त्यसपछि वरियताका आधारमा चारै टोलीले सेमिफाइनल खेल्नेछन् ।  दोस्रो राउन्डको पहिलो र दोस्रो टोलीले पहिलो सेमिफाइनल खेल्नेछन् ।

विजेता टोली फाइनलमा प्रवेश गर्नेछन् । पराजित टोलीले तेस्रो र चौथोबीचको विजेतासँग पुनः सेमिफाइनल खेल्ने अवसर पाउनेछ । विजयी हुने टोली फाइनलमा प्रवेश गर्नेछ । माल्दिभ्सको लिग डिसेम्बर २५ देखि जनवरी १२ सम्म चल्नेछ ।