धुलाबारी (हाम्रो खेलकुद) – नेपाल खेलकुद पत्रकार मञ्च समन्वय शाखा झापाले ‘झापा स्पोर्टस् अवार्ड’ का लागि दाताहरुसँग आर्थिक सम्झौता सुरु गरेको छ । यसै क्रममा आगामी तीन वर्षका लागि अखिल नेपाल फुटबल संघ (एन्फा) का वरिष्ठ उपाध्यक्ष पंकजविक्रम नेम्वाङ र मञ्चबीच आर्थिक सम्झौता नवीकरण भएको छ ।

नेम्वाङले यसअघि अवार्डका तीन संस्करणमा पनि सहयोग गरका थिए । नेम्वाङका भाइ पूर्वफुटबल खेलाडी आशिषविक्रम नेम्वाङको स्मृतिमा मञ्चले ‘झापा स्पोर्टस् अवार्ड’ गर्दै आएको छ । झापाको धुलाबारीमा एक कार्यक्रमका बीच नेम्वाङ र मञ्च झापाका अध्यक्ष हिमाल खरेलले सम्झौतापत्रमा हस्ताक्षर गरे ।

नेम्वाङले आफ्ना भाइको स्मृतिमा मञ्चलाई अवार्ड सम्पन्न गर्न सहयोग गर्दै आएका हुन् । मञ्चका अध्यक्ष खरेलका अनुसार अवार्डको चौथो, पाँचौँ र छैटौँ संस्करणका लागि नेम्वाङले एक लाखका दरले तीन लाख रुपैयाँ प्रदान गर्ने सम्झौता भएको हो । सम्झौतापछि नेम्वाङले खेलकुद क्षेत्रको विकासका लागि सहयोग गर्न पाएकोमा खुसी व्यक्त गरे ।

नेम्वाङले भने, ‘मेरो सानो सहयोगले खेलाडीलाई उत्प्रेरणा मिल्छ भन्ने आशा राखेको छु ।’ कार्यक्रममा अध्यक्ष खरेलले मञ्चमार्फत खेलकुद र खेलाडीको उन्नति र हौसला प्रदान गरेको भन्दै नेम्वाङलाई धन्यवाद दिए । खेलकुद क्षेत्रको विकास र विस्तारका लागि मञ्चले विभिन्न ६ विधामा अवार्ड प्रदान गर्दै आएको छ ।