काठमाडौं (हाम्रो खेलकुद)- नेपाली राष्ट्रिय पुरुष भलिबल टोलीका भरपर्दा सदस्य हरि अधिकारी शनिबार सम्मानित भएका छन् ।
मिडल ब्लकर हरिलाई काश्यप गोत्रीय अधिकारी वंश प्रतिष्ठानले शनिबार सुनसरीमा सम्मान पत्रले सम्मानित गरेको हो । सम्मानपत्रमा अधिकारीले नेपालको राष्ट्रिय खेल भलिबलबाट देशको प्रतिनिधित्व गरेर देशको शिर उचो पारेको उल्लेख छ ।

उनलाई प्रमुख अतिथि नरेन्द्र कुमार अधिकारी, काश्यप गोत्रीय अधिकारी वंश प्रतिष्ठानका अध्यक्ष शान्ति बहादुर अधिकारी र सचिव लिलाराज अधिकारीले सम्मानित गरे । २०७१ देखि विभागीय त्रिभुवन आर्मी क्लबको भलिबल टोलीको महत्वपुर्ण सदस्य रहेका हरि २०७३ देखि लगातार राष्ट्रिय टोलीमा रहेका छन् । उनी नेपाली पुरुष भलिबल टोलीले ऐतिहासिक कास्य पदक जित्दाका सदस्य समेत हुन् ।

माल्दिभ्समा सम्पन्न भएको एभीसी एसियन सेन्ट्रल जोनमा नेपाली पुरुष भलिबल टोलीले ऐतिहासिक कास्यपदक हात पारेको थियो । उनले सेन्ट्रल जोनको तीन संस्करणसँगै २०१८ मा इन्डोनेसियाको जाकार्ता र पालेङवाङमा भएको एसियन गेम्स खेलेका थिए । उनकै उच्च प्रदर्शनमा आर्मीले पछिल्लो तीन वर्षका दर्जनौ प्रतियोगिता जित्न सफल भएको थियो ।