काठमाडौं (हाम्रो खेलकुद)– १३औं सागकी रजत पदक विजेता राष्ट्रिय भलिबल टोलीकी  महत्वपुर्ण सदस्य प्रतिभा मालीको पुलिस टोली माल्दिभ्स लिग भलिबलमा च्याम्पियन बनेको छ । 

शनिबार राति भएको फाइनलमा प्रतिभा सम्मलित पुलिस टोलीले फाइलनमा उम्कोलाई ३–० को सोझो सेटमा पराजित गर्दै च्याम्पियन बन्न सफल भएको हो । निकै प्रतिस्पर्धात्मक पहिलो सेट २७–२५ ले आफ्नो पक्षमा पार्न सफल भएको थियो । त्यसपछिको दुवै पुलिसले २५–१९ र २५–१८ ले सहजै आफ्नो पक्षमा पार्न सफल भयो ।

फाइनलमा उच्च प्रदर्शन गरेकी प्रतिभा खेलको प्लेयर अफ दि म्याच घोषित भइन् । उनी ५ खेलमा तेस्रो पटक प्लेयर अफ दि म्याच हुन सफल भइन् ।

लिग खेल्ने टोलीले माल्दिभ्स बाहिरका एक खेलाडीलाई टोलीमा राख्न पाउने प्रावधान छ । जसमा प्रतिभा पुलिस टोलीमा आबद्ध भएकी थिइन् ।
उम्कोमा थाइल्यान्डकी खेलाडी समावेश छिन् । १३औं साग मंसिर २४ गते सम्पन्न भएको थियो भने प्रतिभा २६ गते माल्दिभ्स प्रस्थान गरेकी थिइन् ।

राष्ट्रिय टोलीकी अर्की सदस्य सरस्वती चौधरीको टोली भने लोरेन्जो लिगमा तेस्रो भएको छ ।  प्रतिभाले यसअघि पनि माल्दिभ्स लिग खेलिसकेकी छिन् । त्यति बेला टोलीलाई च्याम्पियन बनाएकी प्रतिभा उत्कृष्ट खेलाडी घोषित भएकी थिइन् ।

प्रतिभा गत महिना मात्र बंगलादशमा सम्पन्न एभीसी सेन्ट्रल जोन महिला भलिबल प्रतियोगितामा उत्कृष्ट खेलाडी घोषित भएकी थिइन् । उनकै उच्च प्रदर्शनमा नेपालले भलिबलमा ऐतिहासिक उपाधि जितेको थियो । गत साता मात्र नेपालले सागमा पहिलोपटक रजत पदक जित्दा उनले प्रभावशाली प्रदर्शन गरेकी थिइन् ।