काठमाडौं (हाम्रो खेलकुद)– १३ औं सागकी रजत पदक विजेता राष्ट्रिय भलिबल टोलीकी सदस्य प्रतिभा मालीको क्लबले माल्दिभ्स लिग भलिबलमा शनिबार फाइनल खेल्दैछ । प्रतिभा सम्मलित पुलिस टोलीले फाइलनमा उम्कोसँग प्रतिस्पर्धा गर्दैछ ।

लिग खेल्ने टोलीले माल्दिभ्स बाहिरका एक खेलाडीलाई टोलीमा राख्न पाउने प्रावधान छ । जसमा प्रतिभा पुलिस टोलीमा आबद्ध भइकी हुन् । वाम्कोमा थाइल्यान्डकी खेलाडी समावेश छिन् । १३ औं साग मंसिर २४ गते सम्पन्न भएको थियो भने प्रतिभा २६ गते माल्दिभ्स गएकी थिइन् ।

राष्ट्रिय टोलीकी अर्की सदस्य सरस्वती चौधरीको टोली भने लोरेन्जो लिगमा तेस्रो भएको छ । प्रतिभाको टोलीले ४ खेल खेलिसकेको छ । जसमा प्रतिभा २ खेलमा प्लेयर अफ दी म्याच चुनिएकी थिइन् । प्रतिभाले यसअघि पनि माल्दिभ्स लिग खेलिसकेकी छिन् । त्यति बेला टोलीलाई च्याम्पियन बनाएकी प्रतिभा उत्कृष्ट खेलाडी घोषित भइकी थिइन् ।

प्रतिभा गत महिना मात्र एभीसी सेन्ट्रल जोन महिला भलिबल प्रतियोगितामा उत्कृष्ट खेलाडी घोषित भएकी थिइन् । उनकै उच्च प्रदर्शनमा नेपालले ऐतिहासिक उपाधि जितेको थियो । गत साता मात्र नेपालले सागमा पहिलो पटक रजत पदक जित्दा उनले प्रभावशाली प्रदर्शन गरेकी थिइन् ।