काठमाडौं (हाम्रो खेलकुद) – खेलकुद पत्रकारहरुको संस्था नेपाल खेलकुद पत्रकार मञ्चको आलोचना र मागपछि नेपाल ओलम्पिक कमिटी (एनओसी) १३ औं दक्षिण एसियाली खेलकुद (साग) मा टेलिभिजनहरुलाई समाजार प्रायोजनका लागि भिडियो खिच्न दिन सहमत भएको छ ।

दक्षिण एसियाली ओलम्पिक काउन्सिल (एसएओसी) ले १३ औं सागको प्रसारण अधिकार भारतीय कम्पनी एनके मिडिया भेन्चर (नक्षत्र न्यूज) लाई बेचेको थियो । सम्झौताका दौरान सागको भिडियो र फोटो खिच्न प्रतिबन्ध लगाइने बताइएको थियो । मन्च र फोटो पत्रकार क्लबको विरोध पछि फोटो खिच्न दिने सहमति बनेको थियो ।

त्यसपछि पनि मन्चले भिडियो खिच्न पाउनुपर्ने माग राखेपछि एनओसीका अध्यक्ष जीवनराम श्रेष्ठले विज्ञप्ती जारी गर्दै टेलिभिजनले १ मिनेट समाचारका लागि भिडियो खिच्न पाउने व्यवस्था गरिएको जनाएका छन् । एनओसीले जारी गरेको एक्रिडिएसन कार्ड भएकाले मात्र खेलस्थलमा तोकिएको स्थानमा रहि छायाँकन गर्न पाउने बताइएको छ ।

१३ औं साग काठमाडौं, ललिपुर, कास्की र जनकपुरमा मंसिर १५ देखि २४ गते सम्म सञ्चालन हुनेछ । सागमा समावेश भलिबल भने बुधबार सुरु हुँदैछ । सागमा नेपालसहित सात राष्ट्रका ३ हजार भन्दा बढी खेलाडीले २६ खेलमा प्रतिस्पर्धा गर्नेछन् ।