काठमाडौं (हाम्रो खेलकुद)- उपराष्ट्रपति नन्दबहादुर पुनले नेपाली भलिबल इतिहासमा ऐतिहासिक उपाधि जित्न सफल नेपाली महिला राष्ट्रिय भलिबल टोलीलाई मंगलबार सम्मानित गरेका छन् । उपराष्ट्रपति पुनले उपराष्ट्रपतिको भवन, हरितगृहमा ऐतिहासिक उपाधि जित्न सफल नेपाली महिला राष्ट्रिय टोलीलाई बधाई तथा सम्मान गरेका हुन् ।

उनले राष्ट्रिय महिला भलिबल टिमको नाममा कप्तान अरुणा शाही र प्रमुख प्रशिक्षक जगदीश भट्टलाई लिखित बधाई सन्देश हस्तान्तरण गरे । खेलाडीहरुलाई सम्मान गर्दै उपराष्ट्रपति पुनले भलिबलको ४१ वर्षको अन्तर्राष्ट्रिय यात्रामा नेपाललाई पहिलो उपाधि दिलाएर राष्ट्रिय महिला भलिबल खेलाडीहरुले राष्ट्रको गौरव र प्रतिष्ठा बढाएको र आगामी दिनमा भलिबलमा अझै ठूला अन्तर्राष्ट्रिय उपाधिहरु जित्ने अपेक्षासमेत व्यक्त गरे ।

उपराष्ट्रपति पुनले नेपालको राष्ट्रिय खेल भलिबलको विकासका लागि सरकारले छुट्टै बजेटको व्यवस्था गर्नुपर्ने र आसन्न सागमा उपाधिका लागि टिमलाई शुभकामनासमेत दिए । नेपालले गतसाता बंगलादेशमा सम्पन्न प्रथम एभीसी एसियन सेन्ट्रल जोन सिनयर महिला भलिबल च्याम्पियनसिपमा माल्दिभ्सलाई ३–० को सोझो सेटमा पराजित गर्दै नेपाललाई ऐतिहासिक उपाधि जिताएका थिए । नेपाल प्रतियोगितामा अपराजित र एक सेट पनि नगुमाई च्याम्पियन बन्न सफल भएको थियो ।