काठमाडौं (हाम्रो खेलकुद)– दुई साता पछि आयोजना हुने १३ औं दक्षिण एसियाली खेलकुद (साग) को प्रसारण अधिकार भारतीय कम्पनी नक्षत्र न्यूज (एनके) मिडियाले खरिद गरेको छ ।

सागका सबै खेलको प्रत्यक्ष प्रसारण गर्ने सम्झौताबीच राष्ट्रिय खेलकुद खेलकुद परिषद् (राखेप), नेपाल ओलम्पिक कमिटी (एनओसी) र एनके मिडियाबीच आइतबार आयोजित कार्यक्रममा सम्झौता भएको छ । सम्झौता वापत एनकेले राखेपलाई ८ करोड रुपैयाँ दिनेछ । सागलाई अन्तर्राष्ट्रिय रुपमा प्रचार प्रसार गर्ने जिम्मा भने फिस्कल एजेन्टलाई दिएको छ ।

राखेपका तर्फबाट सदस्य सचिव रमेशकुमार सिलवाल, एनओसीका महासचिव निलेन्द्रराज श्रेष्ठ, एनकेका प्रभात रन्जन मल्लिक र फिस्कल एजेन्टका प्रियानाथ चतुराजोपाध्ययले सम्झौता पत्रमा हस्ताक्षर गरेका छन् ।

सम्झौताअनुसार एनके मिडियाले २७ वटै खेलको प्रत्यक्ष प्रसारण गर्नेछ । प्रत्यक्ष प्रसारणका लागि प्राप्त हुने विज्ञापन को रकम पनि राखेपले नै पाउने सम्झौता उल्लेख रहेको बताएको छ । नेपाल टेलिभिजनले पनि सागका सिमित खेलहरुको प्रत्यक्ष प्रसारण गर्ने बताइएको छ ।

साग मंसिर १५ गते देखि २४ गते सम्म काठमाडौं, ललितपुर पोखरा र जनकपुरमा हुँदैछ । ७ देशका ३ हजार बढी खेलाडीले २७ खेलमा प्रतिस्पर्धा गर्नेछन् । उद्घाटन र समापन दशरथ रंगशालमा हुनेछ ।