काठमाडौं (हाम्रो खेलकुद)– थाइल्यान्डकी पोर्न बुरानाप्रसेर्तुक योनेक्स सनराइज नेपाल अन्तर्राष्ट्रिय च्यालेन्ज अन्तर्गत महिला एकलको सेमिफाइनलमा पुगेकी छिन् । च्यालेन्जमा पहिलो वरियतामा रहेकी पोर्नले पाँचौं वरियताकी अष्ट्रेलियन श्वान यु बेन्डी चेनलाई सोझो सेटमा हराउँदै अन्तिम चारको यात्रा तय गरेकी हुन् ।

चेन दुवै सेटमा समान २१–११ ले पराजित भइएकी थिइन् । फाइनल प्रवेशका लागि पोर्नले जापानकी रिको गुन्जीको सामना गर्नुपर्नेछ । रिकोले आठौं वरियताकी भारतीय खेलाडी तन्भी लाडलाई २१–१९, २१–१६ ले हराएकी थिइन् ।

जापानकी अकारी नाकासिजु र दक्षिण कोरियाकी गा युन पार्क पनि महिला एकलको सेमिफाइनलमा पुगेका छन् । अकारीले भारतकी तेस्रो वरियताकी मुग्धा आग्रेलाई २१–१४, २०–२२ र २१–१५ ले हराइन् । पार्कले कोरियाकै सियोङ मिन किमलाई दुवै सेटमा समान २१–१९ ले पराजित गरिन् ।

महिला युगल तर्फ अष्टे«लियामा सेत्याना मापसा र ग्रोन्या सोमरभिल्लेको जोडी भारतका कुहु गर्ग र अनुष्का पारिखलाई २१–११, २१–१० ले हराउँदै सेमिफाइनल पुगेका छन् । भारतका के. मनिषा र रुतपर्ना पान्डाको जोडीले कोरियाका किम मिन जी र गा युन पार्कको जोडीलाई २१–२३, २१–१०, २१–१७ ले पराजित गर्दै अन्तिम चारमा पुगे ।

थाइल्याण्डका चासिनी कोरेपाप र क्वान्छानोक सुद्जाईप्रपरतको जोडी तथा रुईथाचोनोक लाईसुवान र सुपामार्त मिङचुवाको जोडीले पनि सेमिफाइनल पुगेको छ । दोश्रो वरियताका चासिनी र कोरेपापको जोडीले भारतका अपर्ना बलान र त्रिसा जोलीको जोडीलाई २१–१३, २१–१७ ले हरायो । त्यस्तै लाईसुवान र मिङ्गचुवाको जोडीले बंगलादेशका अक्तर सल्पा र अलिना सुल्तानका्े जोडीलाई २१–१४, २०–२२ र २१–१५ ले पराजित गर्यो ।

पुरुष युगल तर्फ भारतका एमआर अर्जून र ध्रुव कपिलाको जोडी अष्ट्रेलियाका सिमोन विङ हाङ ल्युङ र मिचेल ह्विलरको जोडीलाई २१–५, २१–१६ ले हराउँदै अन्तिम चारमा पुग्यो । यस्तै कोरियाका ना सुङ सिउङ र वाङ छानकाको जोडीले थाइल्याण्डका चालोएम्पोन चारओएन्कीतामोर्न र कित्तिसाक नामदासको जोडीलाई २१–१८, १७–२१, २१–१७ ले हरायो ।

भारतका आत्री मनु र रेड्डी बि. सुमेथको जोडीले जापानका सोतारो ईनामित्सु र रिकी ताकेईको जोडीलाई २१–१२, २१–१५ ले तथा कोरियाका किम दुक्योङ र किम सा राङ्गको जोडीले थाइल्याण्डका रुत्तनपाक आउपथोङ्ग र नान्थाकार्न योर्दफाईसोङको जोडीलाई २१–१०, २२–२० ले हराउँदै सेमिफाइनल पुगेका छन् । २५ हजार अमेरिकी डलर पुरस्का रहेको च्लालेन्ज नेपाल ब्याडमिन्टन संघले पहिलो पटक आयोजना गरेको हो । यसअघि संघले सिरिज आयोजना गर्दै आएको थियो । च्यालेन्ज आइतबार सकिनेछ ।