ढाका (हाम्रो खेलकुद) – नेपाली भलिबल इतिहासमा ऐतिहासिक स्वर्णपदक हात पारेको नेपाली राष्ट्रिय महिला भलिबल टोली आज (शुक्रबार) स्वदेश फर्कदै छ । टोलीलाई आज ढाकास्थित नेपाली राजदुतावासले एक कार्यक्रम आयोजना गर्दै बिदाइ गर्यो ।

कार्यक्रममा बोल्दै सहायक राजदुत धनबहादुर ओलीले नेपाली टोलीलाई ऐतिहासिक सफलताको हासिल गरेकोमा बधाई दिए । ‘ नेपाली टोलीले यहाँ आएर प्रतियोगिता जित्दा हामी निकै खुसी छौं । अझ ऐतिहासिक क्षणको साक्षी बन्न पाउँदा धेरै खुसी लागेको छ । अब दक्षिण एसियाली खेलकुदमा यसै सफलतालाई निरन्तरता दिनुहुन्छ भन्ने आशा छ । त्यसका लागि शुभकामना व्यक्त गर्दछु,’ उनले भने ।

कार्यक्रममा नेपाली टोलीलाई शुभकामना मन्तव्यसँगै दिवा भोजनको आयोजना गरिएको थियो । राजदुत ओली प्रतियोगिताको फाइनल खेल अवलोकन गर्न बिहिबार खेलस्थल पनि पुगेका थिए । नेपाली टोली आज नै काठमाडौं प्रस्थान गर्दैछ । टोली अपरान्ह ४ बजे त्रिभुवन अन्तर्राष्ट्रिय विमानस्थलमा ओर्लनेछ ।

बंगलादेशमा भएको प्रथम एभीसी एसियन सेन्ट्रल जोन सिनियर महिला भलिबल च्याम्पियनमा नेपालले माल्दिभ्समाथि ३–० को सोझो सेटमा जित हात पार्दै ऐतिहासिक स्वर्ण हात पारेको थियो । एकपक्षीय खेलमा नेपालले २५–१३, २५–१४ र २५–८ को सहज जित हात पार्दै नेपाली भलिबललाई ऐतिहासिक सफलता दिलाएको थियो । सेन्ट्रल जोनमा अपराजित रहँदै च्याम्पियन बनेको नेपालले सबै पाँच खेलमा एक सेट पनि गुमाएन ।

रजतपदक भन्दा माथि उठ्न नसकेको नेपाललाई जगदिश भट्टको प्रशिक्षणमा यो ऐतिहासिक सफलता पाएको हो । सन् २०१४ मा नेपालले काठमाडौंमा आयोजना भएको प्रथम दक्षिण एसियाली आमन्त्रण महिला भलिबल च्याम्पियनसिपमा रजतपदक जितेको थियो । दक्षिण एसियाली खेलकुदमा नेपालले ३ कास्य जितेको छ ।

नेपालले २०४३ मा थाइल्यान्डसँग खेल्दै अन्तर्राष्ट्रिय भलिबलको यात्रा थालेको थियो । यो सफलता ३३ वर्षपछि आत्मसात गरेको हो ।
१३औं सागको तयारीमा रहेको नेपालले आइतबारदेखि प्रशिक्षण थाल्ने मुख्य प्रशिक्षक जगदिश भट्टले हाम्रो खेलकुदलाई जानकारी गराए ।