ढाका (हाम्रो खेलकुद) – अरुणा शाही नेपाली भलिबल इतिहासमा स्वर्ण पदकसहित ऐतिहासिक सफलता दिलाउने पहिलो कप्तान बनेकी छिन् ।

अरुणा कप्तान बनेको पहिलो अन्तर्राष्ट्रिय प्रतियोगितामै टोलीलाई स्वर्णपदक दिलाउने कप्तान बनेकी हुन् । नियमित कप्तान विनिता बुढाथोकी र उपकप्तान मन्जु गुरुङ प्रारम्भिक टोलीमै नअटाएपछि नेपाल भलिबल संघले अरुणालाई गत महिना कप्तान नियुक्त गरेको थियो । यस्तै उनले आफ्नो कप्तानीमा टोलीलाई सेन्ट्रल जोनमा अपराजित र एक सेट पनि नगुमाईकन च्याम्पियन बनाउन सफल भइन् ।

अरुणा घरेलु भलिबलमा गण्डकी प्रदेशकी मात्रै नभई नेपाली राष्ट्रिय टोलीकै भरपर्दी खेलाडी हुन् । स्पाइकर (हाल लिफ्टर) अरुणाले २०१४ मा नेपालमा आयोजना भएको माल्दिभ्ससँगको मैत्रीपुर्ण खेलबाट राष्ट्रिय टोलीमा ‘डेब्यु’ गरेकी थिइन् । त्यसयता, उनी टोलीको नियमित सदस्य छिन् । प्रशिक्षक जगदीश भट्टले उनलाई यसपटक टोलीमा सेटरको भूमिकामा उतारेका थिए । झन्डै ४ महिना प्रशिक्षण र थाइल्याण्डमा मैत्रीपूर्ण खेलले उनलाई नयाँ भूमिकामा खेल्न सहज भएको थियो ।

अरुणाले राष्ट्रिय टोलीबाट माल्दिभ्ससँगको मैत्रीपुर्ण, भारतसँगको मैत्रीपुर्ण, साउथ एसियन आमन्त्रण भलिबल च्याम्पियनसिप, एभीसी सेन्ट्रल जोन र १२औं दक्षिण एसियाली खेलकुद (साग) खेलेकी छन् । अब उनकै कप्तानीमा नेपालले घरलु भुमिमा १३औं साग खेल्नेछिन् ।