ढाका (हाम्रो खेलकुद) – घरेलु टोली बंगलादेशलाई पराजित गर्दै किर्गिस्तानले एभीसी सेन्ट्रल जोन सिनियर महिला भलिबल च्याम्यिनसिपमा तेस्रो स्थान हात पारेको छ ।

बिहीबार भएको खेलमा किर्गिस्तानले घरेलु टोलीमाथि ३–० को सोझो सेटमा पराजित गर्दै तेस्रो स्थान हासिल गरेको हो । यससँगै किर्गिस्तानले लिग चरणको अन्तिम खेलमा बेहोरेको ३–२ को हारको समेत बदला लिएको छ । बुधबार भएको लिगको अन्तिम खेलमा किर्गिस्तान शुरुवाती दुई सेटमा अग्रता लिएर पनि २–३ को सेटमा पराजित भएको थियो ।

ढाका मिरपुरस्थित शहिद शुरवार्दी इन्डोर हलमा किर्गिस्तानले पहिलो सेटमा २५–१३ को सहज जित निकालेको थियो । दोस्रो सेटमा किर्गिस्तानले २५–१४ को सहज जित निकाल्यो । तेस्रो सेटमा पनि किर्गिस्तान २५–१२ को सेटमा विजयी हुदै तेस्रो स्थान हासिल गर्न सफल भयो । खेलमा उत्कृष्ट प्रदर्शन गरेकी किर्गिस्तानकी कप्तान आइदाइ कादिरोभा प्लेयर अफ द म्याच बनिन् । च्याम्पियनसिपमा बंगलादेश चौथो तथा अंकविहीन बनेको अफगानिस्तान पाँचौ भयो ।

अहिले केहीबेरमा नेपालले उपाधिका लागि माल्दिभ्ससँग खेल्नेछ । यो खेलमा जित हात पारे नेपालले नेपाली भलिबल इतिहासमा ऐतिहासिक उपाधि जित्नेछ ।  बुधबार लिग राउन्डमा फाइनल खेल्ने प्रतिद्धन्द्धी माल्दिभ्सलाई ३–० को सोझो सेटमा पराजित गर्दै नेपाली राष्ट्रिय महिला भलिबल टोली ऐतिहासिक स्वर्णपदक नजिक पुगेको हो ।

नेपाली महिला भलिबल टोलीले हालसम्म स्वर्णपदक जित्न सकेको छैन । २०१४ मा काठमाडौंमा आयोजना भएको दक्षिण एसियाली आमन्त्रण महिला भलिबल च्याम्पियनसिपमा जितेको रजतपदक नै नेपाली भलिबलको सबैभन्दा ठुलो पदक हो । त्यस्तै नेपालले दक्षिण एसियाली खेलकुद प्रतियोगिता (साग) मा तीन कांस्यपदक जितेको छ । गत शनिबारबाट शुरु भएको च्याम्पियनसिपमा ५ राष्ट्रको सहभागिता रहेको थियो ।