ढाका (हाम्रो खेलकुद) – नेपाली राष्ट्रिय भलिबल टोलीकी मिडल ब्लकर सुनिता खड्का बंगलादेशविरुद्धको खेलमा ‘प्लेयर अफ द म्याच’ घोषित भएकी छिन् ।

एभीसी एसियन सेन्ट्रल जोन सिनियर महिला भलिबल च्याम्पियनसिप अन्तर्गत तेस्रो खेलमा घरेलु टोली बंगलादेशविरुद्ध उच्च प्रदर्शन गरेकी सुनिताले ब्लकबाट महत्वपुर्ण ५ अंक जोडेकी थिइन् । उनले एक थान मोवाइल हात पारिन् । यसै च्याम्पियसिपबाट महिला राष्ट्रिय टोलीमा ‘डेब्यु’ गरेकी सुनिताले आफ्नो तेस्रो खेलमा प्लेयर अफ द म्याच हुन सफल भएकी हुन् । सुनिता घरेलु भलिबलमा विभागीय टोली त्रिभुवन आर्मी क्लबबाट खेल्ने गर्छिन ।

प्लेयर अफ द म्याच घोषित भएसँगै सुनिताले निरन्तर मिहनेत र टिमको सहयोगले यो सफलता हात पार्न सफल भएको बताइन् । ‘टिममा प्रशिक्षक, सिनियर दिदी र सहयात्रीको सहयोगले यो सफलता हात पारेको हो । यो सफलताको श्रेय टिमलाई नै छ । प्रतिभा उमेरमा म भन्दा जुनियर हो । तर, प्रतिभाले हामीलाई धेरै कुराहरु सिकाउँछिन् । खेलमा क्रमिक सुधार भइरहेको छ, ’ खेलपछि सुनिताले भनिन, ‘हामी फाइनलमा पुगिसकेका छौं । अब दुवै खेलमा राम्रो भन्दा राम्रो खेल्ने प्रयास गर्नेछु । हाम्रो लक्ष्य गोल्ड मेडल नै हो । हामी त्यसका लागि सक्षम छौं ।’

नेपालले बंगलादेशमाथि २५–७, २५–६ र २५–६ को सहज जित हात पार्दै एक खेल अगावै फाइनलमा स्थान बनाएको थियो । नेपालले जितले माल्दिभ्सले पनि एक खेल अगावै फाइनलमा स्थान बनाएको छ । जितसँगै अपराजित रहेको नेपालले ३ खेलबाट ९ अंक जोड्दै शीर्षस्थानमा उक्लिएको छ । समान खेलबाटै ८ अंक जोडेको माल्दिभ्स दोस्रो स्थानमा छ । पराजित बंगलादेश ३ अंकसहित चौथो तथा ४ अंक जोडेको किर्गिस्तान तेस्रो स्थानमा छ । अफगानिस्तानले कुनै अंक जोड्न सकेन ।

राउन्ड रोविन लिगपछि शीर्ष दुई टोलीले बिहीबार उपाधिका लागि खेल्नेछ । सोही दिन तेस्रो र चौथो स्थानको प्ले अफ हुनेछ । च्याम्पियनसिपका सबै खेलहरु शहिद शुरवार्दी इन्डोर स्टेडियम मिरपुर ढाकामा हुनेछ ।

यो पनि पढ्नुहोस :

बंगलादेशलाई हराउँदै नेपाल फाइनलमा