ढाका (हाम्रो खेलकुद) – माल्दिभ्सले बंगलादेशमा जारी एभीसी एसियन सेन्ट्रल जोन सिनियर महिला भलिबल च्याम्पियनसिपमा लगातार तेस्रो जित निकालेको छ ।

लगातार तेस्रो जित निकाल्ने क्रममा माल्दिभ्सले तुलनात्मक रुपमा कमजोर प्रतिद्धन्द्धी अफगानिस्तानमाथि ३–० को सोझो सेटमा जित निकालेको हो । ढाका मिरपुरस्थित शहिद शुरवार्दी इन्डोर हलमा सोमबार भएको एकपक्षीय खेलमा माल्दिभ्सले अफगानिस्तानमाथि २५–६, २५–७ र २५–८ को सहज जित निकाल्यो । जितसँगै अपराजित रहेको माल्दिभ्सले फाइनल पुग्ने सम्भावना बलियो बनाएको छ ।

पराजित अफगानिस्तान भने अंकविहीन हुदै च्याम्पियनसिपको उपाधि होडबाट बाहिरिएको छ । माल्दिभ्सको ३ खेलबाट ८ अंकसहित शीर्षस्थानमा छ । तीन खेल नै खेलको अफगानिस्तानले अंकको खाता खोल्न सकेको छैन । लगातार दुई खेलमा जित हात पारेको नेपाल ६ अंक जोडेर दोस्रो स्थानमा छ । नेपालले सोमबार नै लगातार दोस्रो जित दर्ता गर्ने क्रममा किर्गिस्तानलाई हराएको थियो । ३ अंक रहेको आयोजक बंगलादेश तेस्रो तथा १ अंक जोडेको किर्गिस्तान चौथो स्थानमा छ ।

च्याम्पियनसिपमा मंगलबार दुई खेल हुनेछ । पहिलो खेलमा अफगानिस्तान र किर्गिस्तानबीच प्रतिस्पर्धा हुनेछ । दोस्रो खेलमा नेपालले आयोजक बंगलादेशको सामना गर्नेछ । नेपालले बंगलादेशलाई पराजित गरे अंक तालिकाको शीर्षस्थानमा उक्लँदै फाइनलमा स्थान पक्का गर्नेछ ।

राउन्ड रोविन लिगपछि शीर्ष दुई टोलीले बिहीबार उपाधिका लागि खेल्नेछन् । सोही दिन तेस्रो र चौथो स्थानको प्ले अफ हुनेछ । च्याम्पियनसिपका सबै खेलहरु शहिद शुरवार्दी इन्डोर स्टेडियम मिरपुर ढाकामा चलिरहेका छन् ।