काठमाडौं (हाम्रो खेलकुद) – नेपाल ब्याडमिन्टन संघको आयोजनामा पहिलो पटक पहिलो पटक अन्तर्राष्ट्रिय च्यालेन्ज हुने भएको छ । बुधबार सुरु हुने प्रतियोगिता मंसिर १ गते सम्म चल्नेछ । यसअघि ब्याडमिन्टनको अन्तर्राष्ट्रिय सिरिज आयोजना गर्दै आएको संघले च्यालेन्ज पहिलो पटक आयोजना गर्न लागेको हो ।

२५ हजार अमेरिकी डलर पुरस्कार राशी रहेको च्यालेन्जमा २१ राष्ट्रका १ सय ४९ खेलाडीको सहभागिता रहने आइतबार आयोजित पत्रकार सम्मेलनमा जानकारी दिइयो । ५ विधामा हुने प्रतिस्पर्धामा पुरुष एकलमा ६७, महिला एकलमा ३८, पुरुष युगलमा २१, महिला युगलमा १७ र मिक्स युगलमा २२ खेलाडी सहभागिता निश्चित भइसकेको संघले जनाएको छ ।

प्रतियोगितामा नेपाल सहित, भारत, जापान, थाइल्यान्ड, कोरिया, रशिया, बंगलादेश, युएसए, क्यानडा, मालदिभ्स, युक्रेन, भियतनाम, मंगोलिया, अष्ट्रेलिया, मलेसिया, ट्रर्की, इन्डोनेसिया, भुटान, पाकिस्तान, इरान र इंग्ल्यान्डका खेलाडीको सहभागिता रहनेछ ।

प्रतियोगितमा झन्डै ७० लाख रुपैयाँ खर्च हुने अनुमान गरिएको छ । नेपाल ब्याडमिन्टन संघका अध्यक्ष रामजीबहादुर श्रेष्ठका अनुसार राष्ट्रिय खेलकुद परिषद (राखेप) ले २० लाख रुपैयाँ योनेक्स सनराइजले ६ हजार डलर, ब्याडमिन्टन एसियाले ११ हजार अमेरिकी डलर सहयोग गरेको जानकारी दिए ।