ढाका (हाम्रो खेलकुद) – नेपाली टोलीकी भरपर्दा स्पाइकर प्रतिभा माली एभीसी एसियन सिनियर महिला सेन्ट्रल जोन भलिबल च्याम्पियनसिप अन्तर्गत अफगानिस्तानविरुद्धको खेलमा प्लेयर अफ दि म्याच घोषित भएकी छिन् ।

शाहिद शुरवार्दी इन्डोर स्टेडियम मिरपुर ढाकामा आइतबार अफगानिस्तानविरुद्धको एकपक्षीय जित हात पार्दा प्रतिभाले उच्च प्रदर्शन गरिन् । पूरै समय कोर्टमा बिताएकी प्रतिभाले पुरस्कारस्वरूप एक थान मोवाइल प्राप्त गरिन् । अफगानिस्तानविरुद्ध नेपाल २५–४, २५–९ र २५–६ को सोझो सेटमा विजयी भएको थियो ।

दोस्रो सेटमा प्रशिक्षक जगदीश भट्टले डेब्यु गरेको ६ खेलाडीलाई नै मैदान उतारेका थिए । उनले प्रतिभासहित नयाँ ६ खेलाडी उतार्दै टोलीको स्तर मापन गरेको बताए । ‘हामीले दोस्रो सेटमा ६ नयाँ खेलाडीलाई प्रतिभासँग खेलायौं । सिनियर खेलाडीले नयाँ खेलाडीलाई गाइड गर्नुपर्छ र प्रदर्शन राम्रो पनि भयो । आजको प्रदर्शन हेर्दा सबै नयाँ खेलाडी आवश्यक पर्दा खेलमा उत्रन तयार रहेको पाएँ,’ प्रशिक्षक भट्टले भने ।

अब नेपालले सोमबार किर्गिस्तानसँग, मंगलबार आयोजक बंगलादेशसँग र बुधबार माल्दिभ्ससँग खेल्ने छ । आजै आयोजक बंगलादेश र माल्दिभ्सबीच खेल हुनेछ । राउन्ड रोविन लिगको शीर्ष  दुई टोलीले उपाधिका लागि नोभेम्वर १४ मा खेल्नेछ । सोही दिन तेस्रो र चौथो स्थानको प्ले अफ हुनेछ ।

च्याम्पियनसिपमा नेपालसहित आयोजक बंगलादेश, अफगानिस्तान, माल्दिभ्स र किर्गिस्तानको सहभागिता रहेको छ । च्याम्पियनसिपका सबै खेलहरु शाहिद शुरवार्दी इन्डोर स्टेडियम, मिरपुर ढाकामा हुनेछ ।