ढाका (हाम्रो खेलकुद) – बंगलादेशमा जारी प्रथम एभीसी एसियन सेन्ट्रल जोन सिनियर महिला भलिबल च्याम्पियनसिपको पहिलो खेलमा अफगानिस्तानविरुद्ध नेपाली टोलीकी भरपर्दा स्पाइकर सरस्वती चौधरीले विश्राम पाउने भएकी छिन् ।

नेपाली राष्ट्रिय टोलीका मुख्य प्रशिक्षक जगदिश भट्टले सरस्वतीलाई अफगानिस्तनविरुद्धको खेलमा विश्राम दिने निर्णय गरेका हुन् । ‘सरस्वतीले प्रशिक्षण दौरान सामान्य चोट बोकेकी थिइन् । क्रमिक सुधार भइरहेको छ । हामी अफगानिस्तानविरुद्ध खेलाएर रिस्क मोल्न चाहन्नौं । हामीले अफगानिस्तानको खेल हेरेका छौं । उनी नभएपनि टिमलाई असर पर्ने छैन,’ प्रशिक्षक भट्टले हाम्रो खेलकुदलाई भने । सरस्वतीले तीन सातो लामो थाइल्यान्डमा अभ्यास र प्रशिक्षणका क्रममा चोट बोकेकी थिइन् ।

नेपालले केही बेरमा अफगानिस्तानसँग खेल्दै पहिलो संस्करणको एभीसी एसियन सेन्ट्रल जोन सिनियर महिला भलिबल च्याम्पियनसिपको सुरुवात गर्दैछ । अफगानिस्तानविरुद्ध मुख्य प्रशिक्षक जगदिश भट्टले टोलीमा समावेश सबै नयाँ ६ खेलाडीलाई डेब्यु गराउने सम्भावना छ । टोलीमा निरुता ठगुन्ना, सोफिया पुन, सुनिता खड्का, जानकी भण्डारी, सलिना श्रेष्ठ र पुनम चन्द नयाँ अनुहार हुन् ।