ढाका (हाम्रो खेलकुद) – आयोजक बंगलादेशको ढाकामा शनिबारदेखि शुरु भएको प्रथम एभीसी एसियन सेन्ट्रल जोन सिनियर महिला भलिबल च्याम्पियनसिपमा विजयी सुरुवात गरेको छ । घरेलु टोली बंगलादेशले अफगानिस्तानमाथि ३–० को सोझो सेटमा जित हात पारेको हो ।

शुरवार्दी इन्डोर स्टेडियम मिरपुर ढाकामा भएको एकपक्षीय खेलमा बंगलादेशले पहिलो सेट २५–९ ले सहजै आफ्नो पक्षमा पारेको थियो । दोस्रो सेटमा पनि २५–९ को सहज जित निकालेको बंगलादेशले तेस्रो सेटमा २५-३ को जित निकाल्यो । जितसँगै बंगलादेशले ३ अंक जोडेको छ । पराजित अफगानिस्तान अंकविहीन छ ।

शनिबारै माल्दिभ्सले किर्गिस्तानमाथि ३–२ को रोमाञ्चक जित निकालेको थियो । माल्दिभ्सले किर्गिस्थानमाथि २६–२४, २२–२५, २५–१४ र १५–१० को सहज जित निकाल्यो ।

नेपालले आइतबार अफगास्नितानसँग खेल्दै प्रतियोगिताको शुरुवात गर्नेछ । त्यसपछि नेपालले सोमबार किर्गिस्तानसँग, मंगलबार आयोजक बंगलादेशसँग र बुधबार माल्दिभ्ससँग खेल्ने छ ।

राउन्ड रोविन लिगको शीर्ष दुई टोलीले उपाधिका लागि नोभेम्वर १४ मा खेल्नेछ । सोही दिन तेस्रो र चौथो स्थानको प्ले हफ हुनेछ । म्पियनसिपमा नेपालसहित आयोजक बंगलादेश, अफगानिस्तान, माल्दिभ्स र किर्गिस्तानको सहभागिता रहेको छ । च्याम्पियनसिपका सबै खेलहरु शाहिद शुरवार्दी इन्डोर स्टेडियम मिरपुर ढाकामा हुनेछ ।

त्यसअघि प्रतियोगिताको उद्घाटन समारोह भएको थियो । बंगलादेश संसदकी सभामुख डाक्टर शार्मिन चौधरीले प्रतियोगिताको उद्घाटन गरेकी थिइन् । उनले सेन्ट्रल जोनमा सहभागी सबै ५ राष्ट्रलाई सफलताको शुभकामना व्यक्त गरिन् ।