ढाका (हाम्रो खेलकुद) – बंगलादेशमा शनिबारदेखि आयोजना हुन लागेको पहिलो संस्करणको एभिसी एसियन सेन्ट्रल जोन सिनियर महिला भलिबल च्याम्पियनसिपको खेल तालिका परिवर्तन भएको छ ।

आयोजक बंगलादेश भलिबल फेडेरेसनले बिहीबार खेल तालिका परिवर्तन गरेको हो । परिवर्तित तालिका अनुसार नेपालले अब पहिलो खेलमा अफगानिस्तानसँग प्रतिस्पर्धा गर्ने भएको छ । खेल आइतबार नेपाली समयअनुसार मध्यान्ह १२ः४५ बजेपछि हुनेछ । यसअघिको तालिकामा नेपालले पहिलो खेलमा माल्दिभ्ससँग खेल्ने तय थियो ।

त्यसपछि नेपालले ११ नोभेम्वरमा किर्गिस्तानसँग, १२ नोभेम्वरमा आयोजक बंगलादेशसँग र १३ नोभेम्वरमा माल्दिभ्ससँग प्रतिस्पर्धा गर्नेछ । राउन्ड रोविन लिगको शीर्ष दुई टोलीले उपाधिका लागि नोभेम्वर १४ मा खेल्नेछ । सोही दिन तेस्रो र चौथो स्थानको प्ले हफ हुनेछ ।
स्वर्ण जित्ने लक्ष्यसहित सेन्ट्रल जोनका लागि नेपाली टोली बिहीबार ढाका पुगिसकेका छन् । नेपाल भलिबल संघले मंगलबार मात्रै अरुणा शाहीको कप्तानीमा १२ सदस्यीय नेपाली टोली घोषणा गरेको थियो ।

च्याम्पियनसिपमा नेपालसहित आयोजक बंगलादेश, अफगानिस्तान, माल्दिभ्स र किर्गिस्तानको सहभागिता रहेको छ । च्याम्पियनसिपका सबै खेलहरु शाहिद शुरवार्दी इन्डोर स्टेडियम मिरपुरमा हुनेछ ।

प्रतियोगिताको पहिलो दिन दुई खेल हुनेछ । पहिलो खेलमा किर्गिस्तान र माल्दिभ्सबीच प्रतिस्पर्धा हुनेछ । त्यसपछि उद्घाटन सत्र र अफगानिस्तान र आयोजक बंगलादेशबीच खेल हुनेछ ।

नेपाली टोली :

अरुणा शाही (कप्तान), प्रतिभा माली, सरस्वती चौधरी, रेश्मा भण्डारी, निरुता ठगुन्ना, जानकी भण्डारी, सोफिया पुन, उषा विष्ट, सुनिता खड्का, कमला पुन, पुनम चन्द र सलिना श्रेष्ठ

अफिसियल :

जगदिश भट्ट (मुख्य प्रशिक्षक), सलिना श्रेष्ठ (प्रशिक्षक), भरत यादव (प्रशिक्षक) र रीता कोइराला (टिम व्यवस्थापक)