काठमाडौं (हाम्रो खेलकुद) – नेपाल भलिबल संघले बंगलादेशमा यसै साता सुरु हुने प्रथम एभीसी एसियन सेन्ट्रल जोन महिला भलिबल च्याम्पियनसिपका लागि १२ सदस्यीय नेपाली टोलीको घोषणा गरेको छ । सेन्ट्रल जोन शुक्रबार सुरु हुनेछ ।

थाइल्यान्डमा १९ दिनको प्रशिक्षण र ७ अभ्यास खेलपछि सोमबार स्वदेश फर्किएको भोलिपल्टै संघले सेन्ट्रल जोनका लागि अरुणा शाहीको कप्तानीमा टोलीको घोषणा गरेको हो । टोली बिहीबार बंगलादेश प्रस्थान गर्नेछ ।

टोलीमा प्रतिभा माली, सरस्वती चौधरी, निरुता ठगुन्ना, अरुणा शाही, जानकी भण्डारी, सोफिया पुन, उषा विष्ट, सुनिता खड्का, कमला पुन, रेश्मा भण्डारी, पुनम चन्द र सलिना श्रेष्ठले स्थान बनाएका छन् ।

सेन्ट्रल जोनका लागि उषा भण्डारी, संगम महतो, शान्ति तामाङ, आरती सुवेदी, शान्ति थारु र हीरा केसीले स्थान बनाउन सकेनन् । अर्को महिना स्वदेशमा आयोजना हुने १३औं दक्षिण एसियाली खेलकुद (साग) का लागि टोलीमा फेरबदल हुन सक्ने संघले जनाएको छ । सागमा १४ खेलाडी सम्म टोलीमा राख्न पाउने प्रावधान रहेको बताइएको छ ।

‘त्यसबाहेक अन्य खेलाडीलाई पनि हामी प्रशिक्षणमा बोलाउन सक्छौं,’ संघका ती पदाधिकारीले भने । साग मंसिर १५ देखि २४ गते सम्म काठमाडौं र पोखारमा आयोजना हुँदैछ ।

जगदिश भट्ट – मुख्य प्रशिक्षक, सलिना श्रेष्ठ – प्रशिक्षक, भरत यादव– प्रशिक्षक, रीता कोइराला – टिम व्यवस्थापक