काठमाडौं (हाम्रो खेलकुद)– नेपाल बक्सिङ संघका पूर्व पदाधिकारीले नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) का युके च्याप्टरका अध्यक्ष एवंम पूर्व बक्सर सिद्धार्थ विक्रम क्षेत्रीलाई सोमबार सम्मान गरेका छन् ।

१३ वर्षदेखि बेलायतमा रहेर पनि नेपाली खेलाडीहरुलाई अप्ठेरो पर्दा सहयोग गर्ने पुण्य कामको नेतृत्व गर्दै आएका क्षेत्रीलाई उनले पुर्याएको योगदानको कदर गर्दै संघका पूर्व पदाधिकारीले सम्मान गरेका हुन् । बक्सिङ परिवारका नाममा आयोजित सम्मान कार्यक्रम बक्सिङ संघका पूर्व अध्यक्ष राजीव श्रेष्ठ र पूर्व महासचिव दीपक गुरुङको पहलमा सम्मान गरिएको थियो ।

उनीहरुले क्षेत्रीलाई दोसल्ला र बुद्धको प्रतिमाका उपहार दिदै सम्मान गरेका हुन् । क्षेत्रीको पहलमा केहि दिनअघि नेपालका लागि अन्तर्राष्ट्रिय प्रतियोगितामा पहिलो गोल गरेका वाइबी घलेलाई २ लाख रुपैयाँ सहयोग गरिएको थियो । अखिल नेपाल फुटबल संघ (एन्फा) का पूर्व केन्द्रिय सदस्य समेत रहेका घले ११ वर्षदेखि पक्षघातबाट पीडित छन् ।

क्षेत्रीको पहलमा समय समयमा बक्सिङ खेलाडीलाई पनि सहयोग हुँदै आएको छ । क्षेत्रीले सम्मानका लागि आफुले काम नगरी नेपाली खेलकुद र खेलाडीको मायाले काम गर्दै आएको सुनाए । उनले थपे, ‘मलाई यस्तो सम्मान होला भन्ने थाहा थिएन । म त यो दोसल्लाह ओडेर आफु बुढो जस्तो महसुस गरेको छु ।’

क्षेत्रीले भविष्यमा एसियाली खेलकुद र ओलम्पिक छनोटलाई मध्यनगर गर्दै ३ देखि ५ खेलाडीलाई बेलायतमा प्रशिक्षणको व्यवस्था मिलाउने पहल भइरहेको जानकारी पनि दिए । ‘उमेर गइसकेका खेलाडी होइन ,’ उनले थपे, ‘नयाँ पुस्ताका सम्भावना भएका खेलाडीहरुलाई ६ महिना सम्मको प्रशिक्षणका लागि हामीले पहल गरिरहेका छौं । ‘उनले आफु जहाँ भएपनि नेपाली खेलकुद र खेलाडीलाई सहयोग गर्न प्रयास गरिरहने बताए ।

बक्सिङ संघका पूर्व महासचिव गुरुङले क्षेत्रीले विगतदेखि नै नेपाली खेलाडीलाई सहयोग गर्दै आएको र स्वदेश फर्केको समय पारेर सम्मान गरिएको जानकारी गराए । संघका पूर्व अध्यक्ष श्रेष्ठले क्षेत्रीको कामको सरहाना गर्दै भविष्यमा पनि सहयोग निरन्तर रहने विश्वास व्यक्त गरे ।

एनएनआइपिएका अध्यक्ष दीपक श्रेष्ठ, राष्ट्रिय खेलकुद परिषद् (राखेप) का सदस्य एवंम बक्सिका उपाध्यक्ष अर्जुन केसी, ओलम्पिक उमेश मास्के, फेन्सिङ संघका अध्यक्ष सुनिलकुमार श्रेष्ठलगायतले क्षेत्रीको प्रशंसा गरेका थिए ।